القمر واليل

إذا كان القمر ممدوح مـن يمـدح سـواد الليـل = وهو اللي فارش ثوبه عشانـك يالقمـر تنشـاف
كثير أوقات ما يُذْكر مـن القهـوة سـواة الهيـل = يضاف برمّة الباقي وإذا جاء المدح ما تنضـاف
ولامن الثمر أثمـر نسـوا جـذعٍ يشيلـه شيـل = ومن أقصى شرايينه شِرِب منْه الثمر (ما عاف )
ويندُر ما يجي طاري لمن يعـدي عـداة الخيـل = ومن له في الحساب أدرى كم القوة مع من خاف ؟
يقاس حصان قدراته ولـو هـو منهـزم وحليـل = ويمكن لا لقـى فرصـة تناثـر فخـر للعـرّاف
ينال الظلم تبجيلـة مـن يديـن المطفـف نيـل = ولكـنّ الوفـا يحتـج عالتصفيـق والإسـفـاف
ومن شال الحمل يُشكرعلى قدر الحمـل والشيـل = وتشكـر كامـل أطرافـه ولا تتفـرّد الأكتـاف
وسيف العاطفة جاير يهوّن كـل خـوف وويـل = ولي صار الفؤاد العين ماشافت سوى اللي شـاف
ملاييـن النجـوم أبهـى ولكـنّ الثنـاء لسهيـل = وتٌجبر كـل عثراتـه وماهـو كامـل الأوصـاف
بحاول أحسِب القطرة مع القطرة يصيـر السيـل = ومجموع الثناء وافي فـلا عـدوى ولا إجحـاف
احاول قـد مـا اقـدر أذكّـر باختـلاف الكيـل = وادعو رافع صوتي بصوت العـدل والإنصـاف
ومنيّ همس للشاعـر إذا نجمـه سطـع بالحيـل = ترى الإبداع هو نجمك وهو اللي لو أفـل تنعـاف
أنا آسف على صدقي إذا به عجـز أو بـه ميـل = أنا أفتح باب للذكرى أحفّز كـل حـرف وقـاف
وأنا أعرف ما القمر خصمي ولاني وِلْدْ عم ّ الليل = ولكنّ الوفاء طبعي عباتـه لـي دفـاء ولحـاف