عادي ...؟؟

السلام عليكم ..

واحد من الشباب عمري ..
يسالني ؟؟
يقول عادي اسوي رايح بزواجي ولا لازم عرضه ؟؟

:>

كل الود ..

لو يجيب فرقة أبو هلال .. ما احد يقوله لا ..
مو هو اللي بيدفع .. خله يطيح واقف ..
تقديري

خله يمنعنا من الشرهه
قال رايح قال
عرضة ويعزمنا ويبشر بالعراضه والشعار
تحياتي

هههههههههههههههههههه

والله الهرجه اني دقيت عليه ابارك له بالملكه ..
واخذنا واعطينا بالعلوم ..
وتاليتها قال بيقوم الزواج بالديره ..
وسالني هذا السوال ..
والصدق قلت مدري بس اتوقع ان البيانو بيلعب رايح فوق راسك
وقلت خل اسالكم واشوف ..

بس والله فكره ..
يعني كل الصيفيه عرضه ..
يعني حبه رايح تغير الجو ..

وناسه ..

ايو اللهـ تكفى ياشنب..

قلهـ ماعندك اي مشكلهـ

هلا هلا يابو ليلى ..
والله يجججججيييييي..
بس يااخي كلش ولا الشرهه بالرغم اني اشوفها عادي ..

والله إن يشرشحونه قوله يقعد على العرضه احسن
إحترامي

قله يقلبها مجالسي ويعزمني أنا وابورايد
وماله إلا نحييها .. بلا رايح بلا جاي ... هههههه

لا لا ابداً
لا يحد بيشرشحه ولا فيها شرهه


الرجآل قال بيجيب رايح
ما قال بيجيب نانسي
والا فرقة حسب الله

عمومآ الله يوفقه ويسعدهـ دنيآ وآخرهـ

وإذا فيهـ رآيح لا ينسى تعزمنا

الله يعطيكم العافيه ..
وعوافي على هالردود ..
ووالله ان ودي يصقع ابوها رايح ونستانس ,,

السفير

ليتك دريت مذا حصل يوم واحد من الرييل سوا سامري في قصر الرجال ذاك ...

وشبوا به جماعته واهبوا فيه شمتة ...

لكن قله يسوي يارجال وانشالله ما يجيه شي ...

هههههههههههههههههههههههه

جاني علمه ...


تبي الصدق يعني نكون واقعين شوي ..

احنا شباب ونشوفها عادي ..

بس لو تقول لشايب فاهم ويقدر الحوار <<مو الي من يوم تقوله يقول ((يافيضي))
بيقلك ليش تتخلى عن عادات ابوك وجدك ومدري ايش ..

فلذلك الفكره من حيث المبدا كويسه ..
ولكن المكان الديره غير مناسب اطلاقا ..
يعني لو في المدن عادي ..

انا في زواجي بااجيب رابح صقر بعد الساعه 10 وذا مايطيب له يسري ..

بس الديره قويه ...

انا اتمنى ابو فهد يجي يعطينا رايه

تقبلوا ودي ..

السفير

والله وانا اخوك ان كني بديت اعرف المعرس ..!!!

عاد اذا هو اللي في بالي مدري يسويها !!

بس بصراحه رأيي :
ان بقاءنا على عاداتنا وعادات اجدادنا وخاصه في الموروث الشعبي مثل العرضه والمدقال هي الأنسب , ولا ننسلخ من هذا اللون الحربي الجميل .

لأننا راح نلبس ثوب غير ثوبنا , وانا لا اؤويد هذه الفكره بتاتاً .
لكن عسى ربنا يوفق هذا المعرس في حياته , وبالرفاه والبنين ..

تقديري و احترامي لسموك ..

هلا يوسف
هههههههههههههههههههههههه
كانك صدته ,,
شف ياجدي اقصد ياصديقي ..
هي السالفه مو سالفه انسلاخ من العادات والتقاليد واستخدامنا لها المصطلحات القويه ماله اي فائده ..
والسالفه هي التجديد ..

يعني الرجال من الناس الي يكرهون العرضه ..
تجيب لك كم شاعر ذا يسب ذا وهذا يرد عليه بسبه اخس ..
وازعاج ومدري كيف ..
هو قال من باب التغير ..
يجيب اورق ووناسه ..
وبعدين عندك الصيف كله عرضه ..
يعني الواحد يطفش ..
عني انا العرضات مااروح لها الا اذا لي غرض ..
مثلا اقابل شخص يواعدني هناك ..
او يشتلني واحد غصب ..

اما ميول نهائيا ,,

والصراحه بدون زعل
اشوفها ازعاج وكلام فاضي ماله اي داعي يسير بين الشعار وسب ..
او في المقابل مدح مبالغ فيه لاهل المعرس او العروس << الي يدفع ..

عموما وجهات نظر واتقبلها بصدر رحب ماهو صاحي ههههههههه

كل الود

المشاركة الأصلية كتبت بواسطة السـفـيـر

هلا يوسف
هههههههههههههههههههههههه

الله يحييك


كانك صدته ,,

ايه شفت كيف ..... مايمديك ..

شف ياجدي اقصد ياصديقي ..

لا جدك احلى عشان اجربها من الحين ..

هي السالفه مو سالفه انسلاخ من العادات والتقاليد واستخدامنا لها المصطلحات القويه ماله اي فائده ..
والسالفه هي التجديد ..

يعني تأتي بتيار جديد , وهذا هو اللي انا اتعارض فيه معك . لأنه هو الأنسلاخ بعينه .
أنا لست متعصب أو متحجر أو متمسك برأيي , بل لنكن واقعيين 75% من المجتمع العمري لن يوافقك هذا المنهج , وانا لست اقول انها نسبه ثابتة , فقد تتلاشى هذه النسبه المعارضه مع مرور الزمن ويتقبلون هذا الأمر .
لكن الموروث الشعبي : هو تراث متوارث ولذلك سمي موروث .
اي بمعنى اصح غير قابل للتجديد .

يعني الرجال من الناس الي يكرهون العرضه ..

وجهة نظره وهو حر فيها ..

تجيب لك كم شاعر ذا يسب ذا وهذا يرد عليه بسبه اخس ..

ماهو شرط السب والشتم , قد تكون القصائد افضل من اله موسيقيه بكثير ياصاحبي .

وازعاج ومدري كيف ..

حتى الأورق فيه ازعاج والله بالعكس زياده في الضجيج حتى ..

هو قال من باب التغير ..

يعني الولد كوول ههههههه .!!!

يجيب اورق ووناسه ..

والله شكله وناسه خويك ذا , وناوي يحتفلون فيه الشيبان يوم الزواج احتفال يحبه قلبه ..

وبعدين عندك الصيف كله عرضه ..
يعني الواحد يطفش ..

طفش خلاص لا يشوف عرضات يالسفير ..موب فرض او واجب .

عني انا العرضات مااروح لها الا اذا لي غرض ..
مثلا اقابل شخص يواعدني هناك ..

اووف والله انك حق مشاوير مالقيت تقابله الا في العرضه ..

او يشتلني واحد غصب ..


مافيه شيء غصب .. وين اصرفها ذي ..؟

اما ميول نهائيا ,,

والصراحه بدون زعل
اشوفها ازعاج وكلام فاضي ماله اي داعي يسير بين الشعار وسب ..
او في المقابل مدح مبالغ فيه لاهل المعرس او العروس << الي يدفع ..


ياخي والله ماعرفت لك يالسفير مره مد مره جزر ههههههههه


عموما وجهات نظر واتقبلها بصدر رحب ماهو صاحي ههههههههه

كل الود

ياحياك وانا تحت امرك في اي استشاره , لكن ذي انا ضدك فيها .