من استعفف اعفه الله .

بسم الله الرحمن الرحيم
السلام عليكم ورحمة الله وبركاته

حياكم الله ... قصتنا اليوم حول شاب طلب العفة وهو فقير فرزقه الله .

يقال كان هناك شاب فقير واراد ان يكمل نصف دينه ويتزوج .
طلب جماعته رفضوه لآنه فقير حاول في اهل القرية لم يستجب له احد .
قرر ان يهجر تلك القرية الطماعين اهلها ويجرب حضه عند غيرهم .
خرج الى قرية اخرى ولما دخلها اول النهار طق على باب احد الساكنين .
فتح له وقال : نعم ؟
قال : محتاج .
اعطاه قليلا من الحب .
اخذه وذهب وحان وقت صلاة الظهر طرق باب رجل اخر وفتح له .
قال عندي ذا الحب وحان وقت الصلاة ودي اتركه عندكم الى بعد الصلاة .
قال : خير .
جاء ديك الرجل ونسف الحب اكل اللي اكل وبعثر الباقي .
جاء صاحب الحب قال : ابغى حبي .
قالوا : العذر والسموحة الديك نثره واكل اللي اكل .
قال : ما فيها ياحبي يالديك !
قالوا خذ الديك .
اخذه وسار في طريقه وحان وقت العصر .
طرق احد الابواب وفتحوا له .
قال : حان وقت الصلاة وعندي هذا الديك لو تحفظونه لي الى بعد الصلاة .
قالوا : تم ووضعوه في الزريبة جاء التيس ونطحه ومات .
عاد الرجل وقال : ابغى الديك .
قالوا والله ماحن عارفين وش نقول لك ولكن نطحه التيس ومات .
قال : ما فيها يالديك يالتيس يا اصيح عليكم بالناس .
قالوا : خذ التيس .
اخذ التيس وسار حتى دخل وقت المغرب .
طرق باب احدهم وقال : حان وقت الصلاة وعندي هذا التيس لو تحفظونه الى بعد الصلاة .
قالوا : ابشر حطه في الزريبة .
حطوه بالزريبة وجات البقرة ورفسته برجلها ومات .
عاد الرجل وقال : ابغى تيسي .
قالوا : والله تيسك رفسته البقرة ومات .
قال : ما فيها يا تيسي يالبقرة يا اصيح عليكم بالناس .
قالوا : تدري خذ البقرة ولا تفضحنا .
اخذها وسار بها حتى دخل وقت العشاء .
طرق اقرب بيت له وقال : وصلت الصلاة وعندي هذه البقرة وبها حليب ودي تحفظونها عندكم وتحلبونها ولكم حليبها وبعد الصلاة اخذها واسري .
قالوا : لابأس وكلفوا بها ابنتهم وقالوا اعلفيها واحلبيها .
تسممت تلك البقرة وحاولوا ينقذونها ما فاد وماتت .
خرج من المسجد وقال : ابغى بقرتي .
قالوا : العذر من الله ثم منك اعلفتها البنت وحلبتها ويظهر انها تسممت وماتت .
قال : لا يمكن انتوا السبب في موتها يا بقرتي يالبنت اللي سممت لها .
قالوا : ما تجي كيف نعطيك البنت مقابل بقرة .
قال : اتزوجها على سنة الله ورسوله والا صحت عليكم بالناس انكم ذبحتوا بقرتي .
شاوروا البنت قالت : موافقة ولا الفضيحة .
نادوا المأذون وملك للرجال ودخل بزوجته واعفّه الله عندما بحث عن العفاف وليس شرطا بين ربعك واقاربك ولكن ابحث عن الحلال و الله يرزقك .

قصة معبرة جداً وهادفة لأبعد حد ..
لاهنت أبو فهد ولك تقديري ..

قصة رائعة ..
وفقك الله.

ابو ريان


شكرا لمرورك بارك الله فيك .

ارتقاء

شكرا لمرورك بارك الله فيك .

بارك الله فيك يا الغالي قصة لها الف معنى

الله يبارك بعمرك وشكرا لمرورك لاهنت .

هذا حيال يبو فهد ..
😁
لكن من قال حقي ... غلب !

ربنا يديك الصحه
سلاااامـ..

العمده

ليش حكمت عليه انه حيّال ؟
الرجل يودع ماله ويلقاه ضاع فقال حقي . هههه

شكرا لمرورك بارك الله فيك .

قصه معبره الله يسلم اياديك يابوفهد

ههههههههههه
ههههههههه

اودع الحب وراح يصلي ..وطلع بديك
وزانت له الشغله ..😁
زين ان قضت الفروض يوم اخذ البنت
الفجر بعيد وقده وصل بيته ...
ولا كان جاب العيد 😁

الريم جعلك تسلمين بارك الله فيك .

العمده

غرضه كان الزواج ولما تزوج خلاص .
من يرهن المره ؟ . هههههههه