عدت 1400 سنة ما تعبتوا؟

شي جداً مؤسف انو من بعد قرون وسنين وعصور عدت واندفنت للحين البعض يتكلم في حكم الموسيقى وحكم عباة الكتف وحكم قصات الشعر وحلق الانف وحكم الحواجب والنقاب عادة ولا عبادة.
يشوف السعودية المحجبة يقول تستاهل اللي يتحرش فيها واذا شاف الشامية ولا المصرية قال شوفوا الحشمة ماشاءالله هههههه !

العالم الخارجي عزز استراتيجيات الادارة الناجحة بنوا مؤوسسات عظيمة للمعلومات اخترعوا الذرة وطلعوا القمر تقدموا في صناعة الصواريخ دعموا حياتهم بالحرية الدينية والسياسة والاحترام الف مؤتمر في السنة يتكلم عن المجالات العلمية الحديثة.
واحنا لاطلعت سعودية عالمة في تخصص قوي سبسبوا فيها وقذفوها وشتموا اهلها عشان قذلتها طالعه ولا بدون حجاب ههههههه

وفوق هذا اذا اختلفت معاهم فكرياً قالوا فاطمة يا ليبرالية ولا علمانية ؟! الدين الاسلامي "الحقيقي" ما تحتاج تكون في مثل هذه الأنظمة الموضوعة بشرياً ليش اصير ليبرالية عشان اطالب بحق الحرية؟ الحرية حق اعطاه الإسلام لكل فرد فيما لا يضر الغير، وهي مجرد انظمة صنعها ثوُّار في قرون سابقة نتيجة ضغط الكنائس عليهم حرّموا عليهم التفكير والبحث، كما يفعل الآن بعض الملتحين بس يمسك المايك اول ما يتكلم فيه هو الحرام وجهنم وغضب الرب والمرأة والأمور اللي تتعلق بالشهوة والجنس وتعدد الزوجات ويلعن اليهود والنصارى!

من كثر ما يهتمون في لعن اليهود والنصارى ويتمنون لهم الهلاك والفناء، وللأسف العرب هم من اصيبوا بالهلاك والحروب والدم وضياع الأنفس وسرقة الأموال وكثرة الأعداء، لله في خلقهِ شؤون.