بعض من نماذج الامهات

دائما نصب الانتقادات,, والاتهامات على بعض الشباب, والبنات, إذا لاحظنا منهم أي تصرفات او سلوكيات خاطئة.
وننسى ان هذا راجع لخلل وقصور في تربية الاسرة لهم واللوم والعتب يرجع للاباء والامهات قبل الابناء
في موضوعي هذا احببت ان اعرض نماذج من بعض الامهات هداهن الله حتى إذا عرف السبب بطل العجب
وهذه قصص واقعية شهدتها بنفسي لكن غيرت في الاسماء حتى لا يساء الظن في أحد

النموذج الاول
من اربع سنوات, اجتمعنا في العيد, في استراحة, كانت مها طفلة عمرها خمس سنين لابسة فستان زهري مزخرف بالابيض قصير الى الركبة, وبدون اكمام , أمها جزاها الله خير لبستها بنطلون وبلوزة تحت الفستان ليستر ما كشفه الفستان .
جاءت ام فيصل وهي من قريبات ام مها وبدأت في انتقادها ,,اش التخلف هذا ياام مها ليش لبست بنتك كذا شوهت شكل الفستان , الفستان غالي,, ,البنت صغيرة ,,, بتعقدين البنت من الآن,, , اش يقولون عليك الناس(هذه من عندي لاني اتوقع هذا تفكيرها)
ام مها : ما اقدر البسها بدون البنطلون والبلوزة لان البنت صغيرة وتلعب, وما تقدر تتحكم في نفسها والاستراحة كبيرة,,, وانا صراحة اخاف على بنتي (وبرضه هذه الاخيرة من عندي )
أم فيصل: الا صدق انك معقدة وقامت راحت بعيد
أم مها تنكدت وزعلت وقالت لي انا ما لبستها هذا الفستان الا عشان ام فيصل جابته هدية لبنتي وعشان إذا شافت اني لبستها اياه تفرح وأنا أصلا ما البس بناتي قصير ولا ابغى اعودهم حتى لو كانوا صغار.
مرت السنين وقابلت ام فيصل قبل اسبوعين وعندها بنت عمرها 16سنة وتفاجأت يوم شفت البنت لابسة نفس لبس مها قبل اربع سنين فستان قصير وتحته بنطلون.
قلت لها تذكرين يوم صحت على ام مها وسمعتيها ذاك الكلام اللي خلاها متنكدة طوال ذيك الليلة وذا الحين اشوف بنتك لابسة نفس اللبس
قالت لي :لااااا هذه موضة السنة وماركة( ABC)
قلت : الا ماركة (لتتبعن سنن من كان قبلكم)

النوذج الثاني
اتصلت على احدى الامهات للاطمئنان
قلت: انت في البيت ؟
قالت: لا في سوق العبايات اشتري لبنتي عباية .
قلت: قبل شهر اشتريتي لها عباية .
قالت : عبايتها الاولى ضيقة و فيها زينة وهذه للمدرسة واسعة وعادية لانهم في المدرسة طلبوها كذا
قلت : سبحان الله يوم المدرسة قالت لاتبدي البنت زينتها قلتوا سمعنا واطعنا ورحنا نبحث عن عباية تكتمل فيها الشروط
ويوم قال رب العباد {ولايبدين زينتهن } قلتوا سمعنا وعصينا استغفر الله العظيم

النموذج الثالث
ام وبنتها 18سنة
قلت : ما شاء الله بنتك نحفت كثير
الام : ايه مشت على نظام غذائي وتمارين رياضية ونقصت عشرة كيلو
قلت: زين انها قدرت تقاوم وتمسك نفسها عن الاكل وتصبر على الرياضة
الام: لا بنتي ما شاء الله عليها عندها ارادة قوية, وصبر, وانا وراها دائم
بعد شوية, أذن العشاء, قمنا للصلاة جاءت البنت تصلي لفت انتباهي صلاتها سريعة وبدون خشوع
نبهت الأم على صلاة بنتها
قالت شباب الله يصلحهم ما عندهم صبر ولا تأني إن شاء الله يهديها( نسيت الكلام اللي قالتها من شوية)
قلت : سبحان الله وش اللي مطلوب منا نصطبر عليها الصلاة ولا الرياضة والرجيم
{ وامر أهلك بالصلاة واصطبر عليها لا نسألك رزقا نحن نرزقك والعاقبةللتقوى}

النوذج الرابع
قلت : بلغني انه فيه محاضرةدينية لداعية رائعة في المكان الفلاني جيبي بناتك ولاتفوتونها.
قالت : قريبة ولا بعيدة ومتى تبدأ .؟
قلت تبعد تقريب ربع ساعة من هنا ومن قبل المغرب الى صلاة العشا.
قالت لا بعيدة عليه وما اقدر اروح خاصة انها في الليل.
بعدها بكم يوم.
قلت: عندنا ضيف من الديرة تفضلواالعشاء.
قالت : اعذرونا معزومين في زواج.
قلت : ما شاء الله زواج مين .؟
قالت : زواج بنت عمة صديقة زميلة بنتي في الجامعة.
قلت : طيب تعالوا تعشوا وروحوا .
قالت: ما نقدر المكان بعيد يبعد عنا ساعة الا ربع بالسيارة ولا ندل الطريق يبغى لنا وقت.
قلت : فعلا الله يسخر لكم من يدلكم على الطريق .
قصدي الطريق المستقيم طريق الهداية
هذه مشاهداتي وانتظر تعليقاتكم

ياشيخه رواياك كلها دواء ومادري كيف قايله

بس ماطابلي النموذج الثالث والثاني لعون

فكر رائع وثقافه وإصرار في السعي لإيصالها ليعم الخير والفائده

تقبلي وافر التقدير

النعيم
ماشا ء الله عليك
نماذج ياكثرها بيننا وممكن يكون لنا واحد او اثنين منها
نسال الله العفو والمغفره

ربنا لاتؤاخذنا ان نسينا او اخطأنا ربنا ولاتحمل علينا اصرا كما حملته على الذين من قبلنا ربنا ولاتحملنا مالا طاقة لنا به
واعف عنا واغفر لنا وارحمنا انت مولانا فانصرنا على القوم الكافرين

شكرا ياريانة العود على المرور وبارك الله فيك
ما طابت لك النماذج الثاني والثالث ليش ؟ إذا انتقدت فيها شئ وضحيه الله يوفقك .

صعب المنال
الله يجزيك خير على المرور والتعليق

ذات الشأن
شكرا على المرور والتعليق احسن الله اليك
كلنا ما نسلم من التقصير نسأل الله الثبات على الحق وأن يغفر لنا ويهدينا ويتقبل منا ومنك الدعاء ويجعل اعمالنا خالصةلوجهه الكريم

النعيم الله يعطيك العافيه على ماكتبتي وتوضيحك للصوره التي نشاهدها يومياً في هذا الزمان أسأل الله الهدايه لنا ولي أخواننا المسلمين