محاوره بين الرئيس بوش والرئيس زيمين حاكم الصين

السلام عليكم ورحمـة الله وبركاتــه
محاورة يمكن تكون قديمه شوي
لكن ان شاء الله انها تعجبكم

سلام رديه على حاكم الصين =بالخير ياراعي النظام الشيوعي
ياجيانق بن زيمن نبى معك قافين =والبرق عانه في المخايل يزوعي
يامرحبا ياقايد الغرب واهلين =ترحيبتن ترضي غفير الجموعي
البرق عانه يبرق يسار ويمين =يوم الرعد حدر السحايب يروعي
ماجيتنا ليلة لفونا المهنين =يومن واشنطن تشب الشموعي
ليلة حكمت الكون في عام الالفين =جوني هل الطالات غصبن وطوعي
ارسلت لك يابن النشامى خطابين =جت لك مناديبي تبارك فزوعي
وانا حكمت الشرق من عام سبعين =ما اعلنت للحكام قبلك خضوعي
انته تحسب الكون باقي بقطبين =الراسماليه وطت كل شوعي
يانايم اصحى مرت اعوام وسنين =ماعاد فيها يابن زيمن رجوعي
يابوش حنا بالسياسه ملمين =ومن دون هيبتنا بنينا الدروعي
ليتك تحل المشكله في فلسطين =عز الله ان ابوك ماهو طقوعي
ياجيانق انا طوفت وحده وثنتين =والثالثه بتكون بين الضلوعي
الطايره وش علمها فالها شين =اللي لها بحماك حول السبوعي
الطايره ماردها غير بكين =جانا يقالبها خبيث الطبوعي
وين احترام الانظمه والقوانين =مثلك عن سلوم الدول مايتوعي
ماهيب يمك رايحه للفلبين =فوق المحيط الها نزول وطلوعي
مار اعترضتوا دربها يالشياطين =عز الله اني من سواتك جزوعي
يابوش يابن بوش تلعب على مين =ماهوب انا اللي بالكلام مخدوعي
يابوش وطتها في الارض الشياهين =كانت تجسس وهزعتها هزوعي
هات الادله كان عندك براهين =يومك تقول ارخت علاك السموعي
مخطين ياهل الصين منتم بمقدين =وشيهانكم عود غرابن خروعي
ركابها يابوش خمسه وعشرين =عسكر من الجيش النظامي نزوعي
حاصرتهم يابوش بالجيم والسين =حتى خذيت العلم منهم قطوعي
عينت طيارك غدا راسه طحين =وامه على قبره تهل الدموعي
الطايره ترجع لنا بعد يومين =اخذ الكلام ولاتطول تعوعي
خل العلوم قصار واسمع لنا زين =عسكرك جولك يالسنافي رجوعي
والطايره لاعاد تنشد لها وين =راحت ديه في واحدن من ربوعي

الله المستعااااااان
حتى بــوش صـار شــاعـــر
تقبلوا اصدق تـــحـــيـــه

حلوووووووووووة يا سيف العرب ...

أعجبتني والله ... الله يرج أبليسك

تحياتي سيف العرب .

الله لايهينك يا سيف العرب على هذه المحاورة الطيبه وعلى فكره ترى بوش جده شاعرعرضه
وزيمين يقولون عمه شاعر قلطه 0


<<<<< عساك سالم وغانم يا طيب الفآل >>>>>

ابو ريان
اسعدني مروركـ الكريم يا غالي
واهم شيء انها اعجبتكـ المحاورة
تقبل اصدق تحيـه ولا عدمنـــاكـ

هههههههههههههههههههههههههههههههه
غرمان بن عزيز

تشرفت بمروركـ الكريم طال عمركـ
تصدق أول مرة أدري ان بوش و زيمين نسل شعّار!
تباركـ الرحمن من شعّار
تقبل اصدق تحيــه ولاهنت على مروركـ العذب