فضحتونا يالسعوديين!!

سلام الله عليكم جميع

بصراحة السعوديين يفشلون والله ... امس كنت مسنتر على النت بعد صلاة العشاء اتصل بعد الصلاة بنص ساعة علي واحد من الشباب يبيني امره (( مايدق الا اذا ماعنده سيارة )) المهم رحت احمي السيارة لاني من يوم طلعت من الدوام ماحركتها

والا واسمع صوت الونانات والزحمة خارشه ام شارعنا


اثاريها سيارات المطافي والا ماغير داعسن طبلونه ويكبس بالنور على السيارات اللي قدامه
اللي قاهرني انه فيه سيارة قدامه ولاكأنه طاقن خبر يتسحب يمشي ولاهوب مهتم في سيارات المطافي اللي وراه

ما كأنه هناك ناس شابتن بيوتهم وتبي من يلحق على اللي بقى منهم
عاد يوم وخر عنه الا ويطمر في وجه سيارة المطافي راعي ددتسن بوغمارتين ...قسما بالله انه يمشي يمكن عشرة ويوم يشغل راعي المطافي الونان ويدقدق له بواري تقفل مع راعي الددتسن ويفحط بوجه المطافي

عاد كل شيء يهون والمصاخين اللي يطاردون وراهم!! ماادري وش يبون بالظبط؟؟ تقول كنهم سلق يطردون لهم حباري<<===لاعاد تشبه ثاني مرة

عاد انا والحق حق ان البيت اللي يبون يروحون لمه كان قريب من عند بيت خويي بعد ماحميت السيارة رحت لبيت خويي ويوم قربت لمه الا امة محمد فوق بعض تقول قطاوة متجمعين على زبالة

ماادري ليش دائما السعوديين يتجمعون عند الحوادث ؟؟!!

عاد اذكر مرة واحد من الشباب كان عايش في امريكا (( كل هالسالفة عشان يعلمكم واحد من خوياه كان عايش في امريكا ))
يقول اذا تبي تشوف السعوديين متجمعين تلقاهم عند اي حادث او حريق
والله فشلتونا في كل مكان يالسعوديين

<<=== احسن ياللبناني


*******************

على طاي الحرايق والمطافي مرة من المراير جت المطافي تبي تطفي بيت في حينا وصلوا الحي وقاموا يحوسون فيه يحوسون فيه مااعرفوا وين البيت ورجعوا لمركزهم

عاد الجيب حق المطافي رجع يحوس ثاني مرة يحوس اللين لقى البيت ... بلغهم ثاني مرة ورجعوا حقين المطافي واشوه انهم لحقوا على الدور الاول لان الدور الثاني احترق كلبووه

جاء بعدهم حق الهلال الاحمر ونفس طريقة الاول قام يحوس يحوس في الحي ولا لقاهم ورجع اللين بلغوه وجاهم ثاني مرة ووصل للبيت المحترق

هالسالفة قسما بالله صارت قدامي ولا فيه امل انساها (( امل ولا حصة ))

بالله وش رايكم في حقين المطافين ماهم بعد يفشلون !!


*******************

هذا واحد بعد من الربع (( ماهوب في حينا هالمرة )))) احرتقت عنده غرفة في الدور الاول
اما الدور الثاني سليم ... اتصل على المطافي يوم وصلوا عنده باقل من خمس دقائق بعد المكالمة (( يعنني 911 ))ويطمرون رجال المطافي وينزولون اهوازهم ويشبكونها في وايتاتاهم وويغرقون ابو الدور الثاني من اوله الى اخره!!

عاد خوينا يسألهم يقول ليش كذا ؟؟!! ليش سبحتوا ابو الدور ماله ذنب ؟؟!! الحريق في الدور اللي تحت وفي غرفة من غرف الدور اللي تحت!!

رد عليه النقيب حقهم وقال عشان النار ماتنتقل للدور الثاني

بالله وش رايكم عقلية حقين المطافي ماهم بعد يفشلون!!


*******************

هذا ولد عم لي شغال في ارامكو يقول لي لامنه صارت حريق كبير في ارامكو وكنا نبي فزعة من الدفاع المدني (( امحق فزعة )) يقول نتصل عليهم على طول ونقول لهم زهبوا اعماركم وعبوا وايتااتكم لاتجونا مثل ذيك المرة وايتكم فاضي


*******************

يالله نستأذن والباقي عليكم

محاتسيكم نار الحب

موضوع جداً شيق واكثر مايشوق فيه ( روايا الشرهة) اللى ماعرفنا مصطلحاتها لا في قواميس العبري ولا الاوردو..
عزانا ان المحترق بنار الحب تخاريفه اكثر من صوابه.
الفضيحة مثل علومك وشرواك.
ارجوا قراءة ما سلف بصدر او سع من حلباء

اخي البعيد

شكرا حبيبي


واتمنى ان تارجع لواقعك اللي انت فيه وترى بام عينك هل ما قلته صحيح من مطاردة دوريات المطافي ودوريات المرور من ضعاف النفوس والمهلوسين بشي اسمه حادث


وبعدين ترجع وترد


واشكرك على وجهت نضرك


واتمنا ان لا اراك من من يطاردون ويبحثون عن تلك التجمعات ؟؟؟؟

تحياتي لك نار الحب

وعليكم السلام والرحمه ..

هلا والله نار الحب ...

الله يعطيك العافيه يا الغالي ..


من ناحية المطافي ومطاردة المطافي والوقوف عند الحوادث...
الظاهره هذي وانا اخوك اتوقع انها من زود حب المساعده ...
وما تدري ممكن تكون من باب حب الاستطلاع واللقافه ..

واتوقع انت لو سويت حادث
او احترق عليك بيت
او غرفه راح تتمنى يوقفون الناس معاك
لأنهم اكيد راح يساعدونك ما راح يطالعون فيك
إلا قليل منهم اللي بيطالعون فيك ...

لكن من ناحية فشلتونا وما فشلتونا ...
الظاهره هذي منتشره في كثير من البلدان ان كانت عربيه او غيرها ...

*******************

ومن ناحية الحرااايق ...
حتى في امريكا وهي امريكا ما يوصلون مكان الحريق الا وهو قد عااااد رماااد ...
والله مطافي السعوديه انها اطلق من مطافي كثير من الدول ...

هذا مره من المرات احترقت علينا شقة في الأردن
الشقة على قولتهم 280 متر

الحريق كان في الغرفه الرئيسيه اللي يسمونها الماستر ...
الحريق كان على الساعه 5 ونص قبل المغرب تقريبا ...

تدري كم جلسووو عشان يطفون الحريق ....
والله العظيم جلسوا أكثر من 6 ساعات عشان يطفون الغرفه الرئيسيه وبسبب فنهم
وحركاااتهم امتدت النار للغرف المجاوره واحرقت الشقه كاملة بكل ما فيها لكن ربي سلم الجوازات كانت معانا ...

وبعد ما خلصت الحريقه ... اقصد بعدما خلصت الشقه ...

جو هذولا حقين المختبر ما ادري ايش اسمهم ...
وقالوا حصل تفاعل بين علبة الفليت والعطور اللي كانت على الكمدينه << جايين يتفلسفون بعدما عادت الشقه رمااااد الله لا يوفقهم خخخخخخخخخخخخخ ..

طبعا ما تراجعوا عن هذا التحليل حقهم ....

*******************

على كل حال يانار الحب الله يعطيك العافيه ...

نحن في السعوديه في نعمه كبيره ولله الحمد ...
وتحمد ربك على العافيه والنعمه والخير والبركه ...

وأسأل الله أن يديمها علينا النعمه ...
وأن يحفظ بلدنا امنا مطمئنا ...

تحياتي لك ..
والسلام عليكم ...

يالله نستأذن والباقي عليكم

محاتسيكم نار الحب

الموضوع صيح واوافقك الرأي على التجمهر ( اللي ماله داعي) وانما من باب التطفل او ليرجع بعلوم كشاهد عيان ، المهم كان نقدي او ( امتعاضي) من المصطلحات المستخدمة الدخيلة على الموقع بحكم عنوانة وانتمائه لـ بني عمرو اللى يروون ويتنتدون ولا هم يحاتسون!.
اسلوبك الساخر التوجيهي وجيه جداً ولكن ودنا به (بحسي) الديرة التي قد تكون تربيت في مرابعها وفيافيها.
ولك وللقراء الاماجد كل الحب والتقدير.