عدم جواز صناديق القبائل

أبو فهد ..
معذور طال عمرك ولا هناك خلاف والهدف نصل لمعرفة الصح وفقك الله ..
طيب المعروف إن صناديق الجماعة بالسنة وليست بالشهر ..
بل ومستحيل تكون بالشهر وهذا على حد علمي بما حولنا من أمور
مثل هذا الصندوق اللي أراه خيري وتكافلي ..

وقت دفع الدية في وقتها راح يكون حملها أكبر واللي ممتنع عن دفع
الـ 100 والـ 200 في السنة راح يمتنع عن أكبر منها بعدين في حينها ووقتها
نرجع في مسألة يا تحط مثل غيرك يا تبقى وحدك في محنتك ..

مسألة الذمم والثقة هذي شغلة ثانية واللي معروف حولنا إن لها برنامج حاسوبي
خاص وبها كامل البيانات جمعاً وإنفاقاً وبشكل واضح ولها لجنة توضح بشكل دوري كل
ما تم فيها ولها وعليها ..

عموماً أرى الحل إذا كان ولابد من الإبتعاد عن الصناديق أنه في التأمين ..
فأي إنسان مؤمن على كل أموره راح يكون التأمين متكفل عنه بكل شئ تماماً ..
وبالتالي يسلم ويسلمون جماعته وصلى الله وبارك ..
تقديري ..

اعتقد ان الفتوى بعيده كل البعد عن الصناديق التكافليه
حددت الفتوى عدم الإجازه للصناديق الخيريه فقط
ووضحت ان سبب عدم الجواز التنافي مع الغرض منها
وهو فعل الخير لسقوط شرط البذل بطيب نفس
كأن تقرر قبيله ما بناء مدرسة تحفيظ بأسم القبيله بمبلغ محدد لكل فرد
العمل هنا خيري والفائده تؤخذ على وجه العموم وليس الحصر بالمشاركين
في العمل...والبذل هنا يشترط طيب النفس

أما الصناديق الأخرى والمخصصه لإدارة ازمه مسماه مثل الدم والديات
فأعتقد أنها لاتدخل في الفتوى
لأنها مبنيه على إتفاق مبرم ولها شروط محدده ووجه بين للإنفاق
ولا تخدم سوى اعضاء محددين مسميين وأزمات محدده وبإتفاق متراضي عليه
وهي لا تصبح جائزه اذا استخدمت السلطه الجبريه مثل سلطة شيخ القبيله او من يحل محله...
لأن المتخلف عنها ينبذ ويصبح لسمو هدفها هناك ضرر بين... ومخالفه للأخلاق الإسلاميه وتشجيع على التكاره في المجتمع ...بل قد تؤدي لإعتراض مصالح المتخلف من تواقيع مرتبطه بشيخ القبيله والتزكيه القبليه

أعذروني على العوده ....
فيه ظاهره جديده ظهرت وما أعرف وش وضعها من الفتوى...

مثلاً وهذا حاصل مهو من نسج الخيال عائله محدده من فخذ من قبيله ما...مابين عشرين بيت او خمسطعشر بيت
سووا اجتماع وأتفقوا الكبار منهم ان الرفد في الزواجات بينهم محدد بمبلغ فلاني
مثلاً الف... الف وخمسميه للفرد وكل بيت من العائله عليهم ذبيحه وعشاء يشاركون فيه في المناسبه ...
هذا غير عرف القبيله في الرفد والنوب او اللي تسمونه اللي طبعاً مايشترط مبلغ محدد وما يشترط ان يكون النوب والرفد دين وسداد دين



هللحين وش وضع هذولا وقعوا في المحظور ومالايجوز....؟؟؟
اذا قلنا ان الحال حال فرح...فوق كذا
الحلول كثيره للمساعده من مساعدات التزويج
اللي تساعد بها الدوله الى عرف القبيله بشكل عام والنوب المتداول بينهم
الى الإتفاق بين المزوج والمتزوج والسعه في أمر الزواج من امكانية التأجيل
الى حلول لا حصر لها

الأختلاف هنا إختلاف ازمات مثل الديه واللي مافيها حلول غير حلول صناديق الديه او الروح او السيف الأملح
طبعاً الزواجات مع هالأثقال الماليه تصير أزمه على أصحاب الدخل المحدود او المعدوم لأن الشرط فيها كل حاصل على بطاقة هويه ومهو الشرط كل حاصل على عمل ومقتدر
وفوق كذا أن الزواجات اصبحت مواسم تمر بفتره محدده من السنه عشرين زواج وتلاقي نفسك
دفعت عشرين ألف وقيمة عشرين راس هذا من غير تكاليف مساعدة العشا وتكاليف حضور الأهل لمناسبة العائله


حقيقه أتمنى اعرف واتمنى توضيح أكثر حول هالفتوى ...إذا هي فعلاً لاتجوز نبهنا من يستحق التنبيه


وشكراً

مرحبا بك يابو سالم وما قلته هو الصحيح .

شكرا لمرورك لا هنت .

أبو ريان

الصياد

اعتقد ان الفتوى حول الاجبار .
بمعنى : لا تجبر احد على الدفع لأن هذا اخذ الأموال بالقوة بغض النظر عن أي أمور أخرى او ما يترتب على عدم الاخذ .
أي موضوع فيه اجبار الناس على الدفع تنطبق عليه الفتوى والله اعلم .

اشكركم على اثراء الموضوع بالنقاش ونسأل الله لنا ولكم وللجميع السلامة والعافية .