قصه اقشعر منها جسدي

من قصص الفرج بعد الشدة

" أيقنت بالهلاك "

دارت أحداث هذه القصة في عطلة الحج قبل سنتين في منطقة الشعيبه وهي منطقه ساحليه بريه على شواطىء البحر الأحمر تقع جنوب جده على طريق الليث,, وتعتبر منطقة تخييم (طلعات) للشباب والعوائل في إجازة الشتاء .

المهم كنا خمسة من الشباب وصلنا الصباح و نصبنا خيمتنا على شاطئ البحر وكالعادة ذبحنا الذبيحة ووو ...الخ .

أنا بصراحة كنت الوحيد بينهم ما أصلي نهائيا يعني وقتها كان عمري 21 ولا أركعها ، مع العلم أن أبوي إمام مسجد و كنت أطيعه في كل شي يقوله ويامر به الا الصلاة وفي حياتي ماسمعتة يدعي على ماكان يقول غير

الله يهديك ويصلحك بس

كان يقومني للصلاة أروح اخذ فره بالسياره وارجع بعد ما يخلصون لأنه هو أول واحد يدخل المسجد وأخر واحد يطلع منه وعليه فهو لا يفقدني وبصراحة كنت عاصي لربي لدرجه مو طبيعيه .

المهم بعد ما تغدينا جهزوا الشباب عدتهم يبغون ينزلون البحر يروحون رحلة غوص ، وطبعا كان لازم واحد يجلس في الخيمة جلست أنا لأني موقد كذا في الغوص جلست لوحدي في الخيمة وكان جنبنا شباب أذن واحد منهم وطلعت برى شفتهم يتجهزون للصلاة قلت تجنبا للإحراج خلني انزل للبحر اخذ لي شوط سباحه .

لبست ونزلت للبحر .. مشيت مشيت الين جيت في منطقه حلوه للسباحه ليست بالعميقه ولا بالقريبة سبحت وسبحت وسبحت ومنطقة الشعيبة معروفه بالأجراف تعرفون الأجراف أكيد,, المهم تعبت شوي وقلت خلني أنام على ظهري وأهمل جسمي على أساس أريح شوي وارجع ، سويت الحركة و جلست أطفو شوي ... وووفجأه ... حسيت أن واحد سحبني لتحت ونزلت تحت المويه حاولت أوقف على ارض البحر وادف نفسي فوق على بالي أن المسافة مترين تقريبا اثاريني وأنا أسبح بعدت ونزلت في جرف وأنا ما ادري وطبيت في منطقه عمقها 5 أمتار تقريبا .

حاولت اطلع حاولت وحاولت مااقدرت حسيت كان فيه شخص فوقي وماسكتي مع راسي ويدفني لتحت احاول بكل الطرق اللي تعلمتها في النادي ماقدرت اطلع كنت في حاله ياشباب لا احسد عليها كنت متلخبط واخبص في المويه حسيت أني ولاشي, حسيت وقتها أني اضعف من الذباب ... بدأ النفس يضيع النفس مني بديت احس بالدم يحتقن في راسي ... بالعربي بدأت احس بالموووووت.



بديت أتذكر أبوي وأمي وإخواني وأقاربي وأصحابي وعيال الحارة والعامل في البقاله وكل شخص مر علي بحياتي تذكرت كل شيء سويته وكلها في ثواني معدووده ... وبعدها تذكرت نفسي !!!

بدأت اسأل نفسي: صليت؟ لا

صمت؟ لا

حجيت؟ لا

تصدقت؟ لالالالالالالالالالالالالا

أنت في طريقك لربك خلاص مفارق لدنياك مفارق لأصحابك كيف تبي تقابل ربك؟

وفجأة سمعت صوت أبوي وهو يناديني باسمي ويقول قوم صلي ... تكرر الصوت بأذني ثلاث مرات بعدها سمعت صوته وهو يأذن ...حسيت انه قريب بيجي يطلعني صرت أنادي عليه وأصيح ... باسمه والمويه تدخل في فمي أصيح وأصيح مامن مجيب...حسيت بالملوحة المويه في أعماق جسمي وبدا النفس يتقطع ... أيقنت بالهلاك... حاولت انطق بالشهادة.. نطقت أشهـ.. أشهـ.. ولا اقدر أكملها كأن فيه يد قابضه على حلقي تمنعني من نطقها حسيت أن روحي خلاص بتطلع... وتوقفت عن الحركه... وهذ آخر شي كنت أتذكره ... صحيت في الخيمه وكان عندي عسكري من خفر السواحل والشباب اللي جنبنا ... أول ما صحيت قالي العسكري حمد لله على السلامة ومشي سالت اللي عندي قلت منهو ذا ومتى جاء وكيف قالوا ما ندري !!! جانا فجأه وطلعك وزي ما تشوف مشي فجأه!!!! سألتهم قلت شفتوني وانا في المويه قالوا مع أننا كنا على الشاطي لكن قسم بالله ماشفناك !!! ما درينا عنك الايوم جاء العسكري وطلعك من البحر ... مع العلم أن مركز خفر السواحل يبعد عن خيمتنا تقريبا حوالي 20 كيلو متر طريق بري يعني يبيله تقريبا ثلث ساعة عشان يوصل لنا أذا جاه بلاغ.... وحادث الغرق صارت في دقائق معدوده واللي جنبنا وهم اقرب ناس مني وقتها يحلفون انهم ما شافوني كيف شافني العسكري وجاني !!! وربي اللي خلقني ليومكم ذا ما اعرف كيف وصل لي..!!!

أحداث عجيبة !!!

ودق جوالي مسكته الا وهو أبوي بدت الأمور تتلخبط عندي بدا التشويش قبل شوي سمعت صوته والحين يتصل !!!؟

رديت عليه كفيك وش أخبارك سألني قالي أنت بخير وكررها كذا مره طبعا ما ابي اعلمه عشان مايقلق سايست الأمور وقفلت.. قفلت من عنده و قمت صليت ركعتين في حياتي ماصليت مثلها ركعيتين جلست اصليهم في نص ساعه ركعتين صليتها من قلب صادق وبكيت فيهم الين انبح صوتي.

في نفس اليوم يوم رجعوا الشباب قلت لهم أنا ماشي ورجعت للبيت ... اول مارجعت كان ابوي موجود ... اول ما فتحت الباب الا وهو في وجهي قال تعال ابيك ... جيت معاه قال امنتك بالله وش صار معاك اليوم العصر؟؟

تفاجأت واندهشت وتبلعمت ما قدرت اتكلم...حسيت كأن عنده خبر!! ... كرر السؤال مرتين... المهم حكيت له بالتفصيل الممل قالي والله اني سامعك تناديني وانا ساجد السجود الثاني في آخر ركعه وكانك في مصيبه مابعدها مصيبه انت تناديني بصياح واحس قلبي يبي يتقطع وانا اسمع صوتك وما دريت عن نفسي الا وانا أدعو لك بأعلى صوتي والناس تسمع !!!

وفجاه حسيت كأن واحد كب علي مويه بااااارده ...

طلعت من المسجد بعد الصلاه واتصلت عليك على طول والحمد لله رديت علي وحسيت اني ارتحت اكثر ... لكن ياولدي الصلاة انت مفرط فيها وعلى بالك الدنيا بتدوم لك ماتدري أن ربك يقدر يقلب حالك في ثواني وهذا شي بسيط من اللي يقدر ربك يسويه فيك ... لكن ربي كاتب لك عمر جديد.

عرفت أن اللي أنقذني من الموقف كان برحمة الله اول شي ثم دعوة ابوي لي ... وهذه لمسه بسيطة من لمسات الموت لكي يرينا الخالق عز وجل أن الإنسان مهما بلغت قوته وبطشه يصبح اضعف مخلوق أمام بطش الله وجبروته عز وجل ومن يومها ما تركت ولا غابت عني الصلاة ولله الحمد.

فيا شباب عليكم بطاعة الخالق وبر الوالدين.

عن بُرَيْدَة رضي الله عنه عن النبيِّ صلى الله عليه وسلم قَالَ :

((العَهْدُ الَّذِي بَيْنَنَا وَبَيْنَهُمْ الصَّلاَةُ ،

فَمَنْ تَرَكَهَا فَقَدْ كَفَرَ ))

(( حَدِيثٌ حَسَنٌ صحيح )) .

*** القصة منقولة للفائده ***

اللَّهُمَّ إِنِّى أَعُوذُ بِكَ مِنْ زَوَالِ نِعْمَتِكَ وَتَحَوُّلِ عَافِيَتِكَ وَفُجَاءَةِ نِقْمَتِكَ وَجَمِيعِ سَخَطِكَ


أختكم ومحبتكم ...انثى تختصر النساء

سبحانك اللهم وبحمدك ، أشهد أن لا إله إلا أنت أستغفرك وأتوب إليك
الله يهدي شباب المسلمين ومشكوره على الموضوع

الله يعطيك العافيه على هذا التذكير الطيب
والله يهدي الجميع وينير بصائرهم
اشكرك وجزاك الله خير
ابو عبدالله

انثى تختصر النساء الله يعطيك العافية على هذا النقل الرائع وجزاك الله خير فقد كان في القصة تذكير بالصلاة وهي عامود الاسلام وصلة العبد بربه حتى اذا طلبه ودعاه يكون هناك صلة بينه وبين ربه والصلاة هي اقوى صلة والمحافظة عليها في وقتها ومع الجماعة من اهم واقوى الاسباب باذن الله التي تعينك على النطق بالشهادة عندما تبلغ الروح الحلقوم وتحفظك ماحييت وتانسك في ظلمة القبر ووحشته وتنجيك يوم لاينفع مالاً ولا بنون وتدخلك ان شاء الله جنات نعيم وفوائد الصلاة كثيرة ولاتحصى في الدنيا ومن يحافظ عليها في وقتها يتذوق حلاوتها في الدنيا فكيف بدار القرار الابدية وماعند الله خيرُ وابقى والحديث عن لذة الصلاة يطول وانا اعرف ان الكثير هنا ولله الحمد والفضل والمنة ممن يتمتعون بفوائد الصلاة ولكن فذكر ان الذكرى تنفع المؤمنين. وايضاً دعاء الوالد لاننسى ان دعوة الوالد مستجابة وكانت بفضل الله سبحانه وتعالى دعوة والده لحظة سجوده مستجابه يوم جاء العسكري وانقذه وايضاً التذكير بلحظة الموت الذي نفر منه ولا مفر منه ولا مهرب فهو حقاً علينا في الدنيا ولكن ماذا اعددنا له وماذ عملنا قبله وهل نحن مستعدون لرحيل وهل جهزنا لما بعده اسئلة كثيرة تدور في ذهنك في لحظات الموت تبحث عن اجابتها فمنهم من يرحمه الله ويعيده للحياة حتى يتوب ويصلح عمله ومنهم من ياخذه الله اخذ عزيز مقتدر بسوء عمله ولكن نسال الله ان يجعل خير اعمارنا اواخرها وخير اعمالنا خواتيمها وخير ايامنا يوم ان نلقاه .
قصة جميلة ومعبرة في نفس الوقت واتمنى ان يستفيد منها الجميع تحياتي لك

ابو دايل...ابو عبدالله...المجهووول........تسلمون يعطيكم العافيه على المرووور

تكفون ياأعضاء كل شي الا الصلاه..
ألف شكر..

صدى الامواج اسعدني تواجدك يعطيك العافيه