مدقال !!

بسم الله الرحمن الرحيم
السلام عليكم ............ عساكم بخير ؟
بما انّي غبت عنكم فترة طويلة بادخل عليكم بمدقال ,, يعني محتزم بالزهاب
وشايل المقمع ,, طبعـــــــــــاً مسالم ! وعمري ما كنت إلا مسالما




بدأ الجو يحلا في الرياض وجاء وقت البر وشبّة الضوء وسعة الصــدر ؛
قبل حوالي اسبوع تقابلت مع مجموعة من الزملاء في حفل عشاء واتفقنا على طلعة للطعوس باليوم التالي
وكان الموعد بعد صلاة العصر , تأخرت فسحبوا عليه المجرمين وراحوا على سيارة واحدة
قررت اللحاق بهم مهما كلف الامر , مع العلم ان المكان اللي حددوه لا يوجد فيه ارسال
طلعت بعد المغرب والحمد لله دليت المكان ولكني وصلت بعد العاشرة مساء
اهم شيء لحقت العشاء والسمرة في البر وكان الجو رائع جداً
وعقابا لي ع التأخير قالوا ترجع لحالكـ مثلما جيت لحالكـ
سرينا بعد الثانية فجراً ومن الخرعة كنت ادندن بالطريق
وطلعت معي الرزفة هذي فقلت ..
اشاركـ بها هنا !


البارحــــــة قلت حثّ الســير يا ســــاقي
القلب كنّــــــــه ســجيـــن يــدوّرالهَجّـــة

تسوقني يم صحـــراء نــــــجد لاشـواقي
عانقت برد النفــــــــود فطــــالت السَجّة

عامـــين والدمع راكـــــد خلف لاحداقي
وانساب ســـاعة غدا وسط الحشـــا لجّة

ذكرت ذيكـ الســـنين وقلت وش بـاقي ؟
خمسين عــام(ن) مضت ما كنّهــا حِجّة

فيهــــا مـــــداد الليـــالي سطّـر اوراقي
رســـم عليهـا صَفــــاة الجــــوّ والعَجّة

كنت اعتبر نفسي الســــوّاق والســـاقي
من حيث ما وجهّت لانســــام متـــوجّه

صحيح ما خــابت احلامي ولا اخلاقي
لكن ليــــا شفت صيـــــد يصيبني رَجّة

مدري ترف عيش وإلا طـيش عُشـاقي
او هي صَبــابة صِبــا والا الصِبـا دَجّة

راحت ولا باقي الا الهــــم باعمـــاقي
من غُرّة امحـــرم اليــا ذيل ذي الحجّة

صـارت سجــــلّات في ملف عــــلاقي
محفـوظ ما بين درج الصمت والصجّة

إن عشت لاصنع بصبري للورق واقي
وامســـح بتوبـــــة ندامـــة كلّ معوجّة

وانكـــان ماعـــاد بـه للشمـس مشـراقي
رجــاي بالله ,, ونفسي غيـــر محتــجّة

يا الله يا مفني الاكــــوان .. يا البــــاقي
تغفر ذنوب(ن) جنـــاها عبــــدكـ ونَجّه

وختــــامها ما لمـــع بالنّـــــــــو برّاقي
صـــلاة ربي على المبعـــوث بالحِـجّة


وسلامتكم جميعا
لا مانع ان يراجع الانسان نفسه احياناً يسوي اللي يقدر عليه
والباقي على الله.. دمتم انقيـــــــــاء ! والي اللقاء !

الله يسلمك ...... ويصح لسانك

وودي إنه خرشبك يعري لكن الله سلم

والحمد لله عل العودة و فعلا من طول الغيبات جاب الغنايم

أما الرزفة فهذي أول مرة أسمع بزفة نظم ولكن أبدعت في الأدء كالعادة


تقديري

وعليكم السلام
نورت برجعتك
تغيب وترجع باالجميل والرائع
صح لسانگ

راحت ولا باقي الا الهــــم باعمـــاقي
من غُرّة امحـــرم اليــا ذيل ذي الحجّة

صـارت سجــــلّات في ملف عــــلاقي
محفـوظ ما بين درج الصمت والصجّة

ابيات جميييله ..كعادتك تجبرنا على المتابعة يامهندس الحرف
سلم البيان والبنان🌹

شفت ما أحسن من اللي يمشي وحده ( لو غصب ) ..
على الأقل يهوجس ويطلع بشئ حلو وجميل وما هذه الرائعة إلاّ دليل ..
واحد الله ( يستر عليه ) يقول إذا مشى لحاله يتحلّم إنه يلعب مع السكون
المهم الله سلمك وسلم هذه القصيدة وجات على ما نحب وأكثر ..
قصيدة أقل ما أقول عنها تشفي الغليل ومالم يكن شافياً وافياً لا طعم له ..
قمة الذوق والمعنى والهدف والمغزي والشرح والتبيين ..
منها للأجمل وخذ راحت بالغياب دام ما بعده إلاّ مثل هذي رغم علمي بوجود كل جميل
حال حضورك على الدوام ولكن مع الوافين نوفي العذر وصح الله لسانك ..
تقديري ..

صح لسانك قصيدة رائعة وليست غريبة عليك .

شكرا لك ولتواجدك معنا .

وعليكم السلام ورحمة الله وبركاته
ابيات رائعه ماشاءالله
صح لسانك..الف شكر لك

صح الله لسانك مهندس الكلمه

ابو سيف , عطر الحكي , الشمالية
شكرا لجودكم بوجودكم ,,,,,,,,,, دمتم بود

ابو ريان وابو فهد
بيض الله وجهيكما على الدعم والمجاملة الراقية
كل تقديري واحترامي

عذبة ,, ابن عياش
عشتم بسعادة ما اعذب حضوركما
كل الود واجمل الورد فالكما