قصيدة مدح

من باب التنويع في اللاغراض الشعرية
قصيدة أهديتها للشيخ علي البرغش التميمي من شيوخ بني تميم في نجد والذي أعتز بصداقته كما ان له معي مواقف لا تنسى آخرها تسديد قرض الراجحي عني

يالله يا عالم خفا كل خافي=يا من بيدْك المقدره والتصاريف
انت القوي واحنا العبيد الضعافي=ونفوسنا لرضاك عنها ملاهيف
فاغفر خطايانا ثقال وخفافي=واجعل لنا من جاير الحمل تخفيف
اتوب لك من زلّتي واقترافي =ومن الكباير واللمم والتناتيف
واتوب من رمي المدايح جزافي=على الذي ماله على الطيب تصنيف
الله يا كم من رديٍ وهافي=ولّفت له مجدٍ من الهرج توليف
الحّفه ثوب الشجاعة لحافي=واقول هذا اللي عبر خط برليف
واتوب من خوّة شيوح الغلافي=اللي شياختهم على الغش والزيف
اعلنت تركي مدحهم وانصرافي=ما عاد ابي منهم شهادة وتعريف
قابلت لي شيخٍ شجيعٍ ووافي=شيخة فعل ماهيب شيخة سواليف
ما يختلف لو في الزمان اختلافي=مثل الجبل راسي على الارض ومنيف
شيخٍ على داره تدور المطافي=من كبر ناره يوم يلفي له الضيف
النار حيه والدلال اصطفافي=والعود لزرق ثاير(ن) له عواصيف
والقهوجيه تو ضيفٍ ولافي=مثل العساكر في الخفاره مواقيف
وصياني الحشوان بين الهرافي=تفرش على قدرٍ وحشمه وتشريف
عند الذي ماقفْه وافي وكافي=الجيد اللي ماحسب للتكاليف
عند ابن برغش كل طيبٍ يشافي=ما فيه شيٍ يرفع الراس ما شيف
ويا هاجسي نوّخ ذلولي لقافي=الشعر يبغاله تمكن وتوضيف
تظهر عليه رهبتي وارتجافي=لا جيت اوصّف راعي الطيب توصيف
اخاف ما اوفيه واصير جافي=ثمن يقولون العرب مدة اضعيف
ووالله لو ماهوب شيخٍ سنافي=ترفع له البيضا بروس المشاريف
وتوله عليه ام الشرف والعفافي=اللي تغطرف من ولهها غطاريف
ما تنعسف له شاردات القوافي=ولا تنوجد له نادرات المحاريف
عطواه مثل السيل عقب الجفافي=لاقام يجرف جرّة الوقت تجريف
في الديره اللي بين عجٍ وسافي=ما لاح بارقها من الصيف للصيف
وربعه تميم اهل السيوف الرهافي=من خلقة الدنيا هل الرمح والسيف
قبيلةٍ ماهيب حزب ءاتلافي=ولا شتاتٍ جمّعته الصواديف
قادة شعوبٍ وردوا العد صافي=واعيان نجد الصارمين العواريف
في مدحهم يبغالنا وقت اضافي=لنّ البحر ما ينغرف بالمغاريف
ان جيتهم تشكي السنين العجافي=عوّد زمانك ينثني لك على الكيف
وان جوك في وسع الصدور النظافي=مثل البواخر يوم تقبل على السيف

خالد العمري

يلوموني فيك ..
على الحرام إنك شاعر كفو وتستاهل رفقة الشيوخ يا شيخ..
كفو وقصيدتك كفو وعلى مستوى عالي ..
وبصراحة كفيت ووفيت ببناءها وكل ما فيها من علومٍ غانمة ..
بيض الله وجهك ..
لله درك وصح لسانك ولك تقديري ..

شاعرنا خالد
بيض الله وجهكـ ايها القدير
عسفت القوافي واعتليت صهوتها وجبت نادرات المحاريف
في مدح من يستاهل المدح والتشريف

ابدعت ولا غرابة يا ابا الوليد
تعودنا منكـ كل جزل يا فارس الكلمة
وحق للمنتدى أن يفخر .. بوجودكـ الغالي

شكري واحترامي

واتـــوب مـــن رمــــي الـمـدايــح جــزافــي=على الذي ماله على الطيـب تصنيـف
الله يـــــــا كـــــــم مــــــــن رديٍ وهــــافــــي=ولّـفـت لــه مـجـدٍ مـــن الـهــرج تـولـيـف
الـحّــفــه ثــــــوب الـشـجــاعــة لــحــافــي=واقــول هــذا الـلـي عـبــر خـــط بـرلـيـف
واتـــوب مــــن خــــوّة شــيــوح الـغـلافــي=اللـي شياختـهـم عـلـى الـغـش والـزيـف

"

نعم والف نعم لمبداك ايه الشاعر توبه انبثقت من واقع التجربه لله درك يامبدع

مدح من لايستحق ظلم للمشاعر والشعر ابدعت واسبهبت بلأبداع

وما اجمل اسهابك

واعود

وســ ابقى هنا مع الابيات التاليه
"
"

اعـلـنــت تــركــي مـدحــهــم وانـصــرافــي=مـا عـاد ابــي منـهـم شـهـادة وتعـريـف
قـابـلــت لــــي شــيــخٍ شـجـيــعٍ ووافـــــي=شيخـة فعـل ماهـيـب شيـخـة سوالـيـف

"
وما اجمل انصرافك ياخوي ياخالد

وانا اضم صوتي لصوتك هنا. الله يسعدك ما اجمل ماكتبت ارويت الذائقه وزياده

تحياتي لك يامبدع

بيض الله وجهك شاعرنا القدير ويستاهل
الشيخ علي المدح فلن تترك لنا شي
وقد فصلت القصيده

دمت وافي ولاعدمناك

خالد بن مشرف
صح لسانك مليون ولا يسدوون وأنت كفو ويستاهل الممدوح
نص كثيف الجمال وبليغ المعنى بالقدر الذي يدهشنا ويجعلنا نستمتع
ونقف اعجاباً لهذا الحرف وصاحبه ..
سلم قلمك ودآم نبض قلبك يآراقي..

خالد

صح لسانك وجمل حالك وبارك فيك

وبيض اله وجهك على القصيدة الراائعة

ولك تحيتي

أينما تحل ياخالد يكون الإبداع حليفاً لك
شاعر نفتخر في ماتقدمه من قصائد فريدة لا تأتي إلا من متمكن
الحرف والمعنى رفيقان وأختاروك لتمثلهم وقد فعلت ومثلتهم أجمل تمثيل

ترويني شعراً كل ماقرأت لك
صح لسانك مليون

أخواني

ابو ريان
المهندس
بدر الشمري
المسكت
يمك دروبي
سد الوادي
المهاجر 07
صحت ابدانكم وانا اعلم اني لو خصصت لكل واحد منكم متصفح كامل ما اوفيتكم حقكم ولما استطعت أن اعبر عن ما أكنه لكم من معزة وتقدير ويعلم الله ان ما أكتبه في هذا المنتدى بالذات ليس لقصد الحصول على إشادة أو لتحقيق إنتشار مع ان اشادتكم ومعرفتكم هي أغلى ما جنيته من الشعر كيف لا وهي من ربعي وتاج راسي
ولكن لي تجربة في شعر النبط خدمتها الضروف والممارسة وحبيت اضعها بين يديكم لعل بينها ما يفيد
ولا يعني هذا اني احسن من زملائي في هذا المنتدى والذي هو من اقوى المنتديات بشعرائه وادارته ومشرفيه
ومرتاديه ومضمونه

تقبلوا شكري وتقديري