سوالف وعلوم وسعه صدر ههههه

(10)





اذكر مره قبل ماعرس يوم اني بنت بنوت خخخخخخخ انحاشو خدامات اهلي في رمضان

قامت امي تول ول

رجلن عصبي ويحب الاكل الزين<<<<ابو طخومه
وبنات داجات مايعرفون يسوون شي<<<<طخومه واخواتها على وزن كان واخواتها
وام تحب السنع والزين<<<<<ام المجني عليها طخومه خخخخخخ

مير يوم شفنا امي ضايق صدرها ونقوم نفزع انا وخواتي معها في المطبخ

قالت امي اللقيمات هي الي تاخذ وقت وابوكم يحبها وهي عاجنتها قالت بس انت لقموها وبعيدن ننقي الزين منها نحطه لابوكم والشين لكم

<<<تعجبني امي صريحه
مير اختي تلقم بالملعقه عقب ماعلمتنا امي الطريقه وانا حاطه الملاس في الزيت مايمديها تلقم وحده الا انا شايلتها صاير لونها احمر حلوه
وانا واختي فرحانين هي تلقم وانا اشيل
يوم خلصنا يازينها غالبها مدوره مغير اذاني سعينونه والا خرطوم صغير مامداها تمطط على طول انا اشيل
اثاري النار عاليه مررررررررر ه
جبنا لقيماتنا وفرحانين فيها
قالت امي ياويلكم لو تقولون انكم انتم ملقمين

<<<خابره ابوي مايحب مطرسه البزارين



يوم حطت اللقيمات تو ابوي مدخل اول وحده في فمه مير تصب من بين بريطماته<<<متعوب عليها

تصب العجينه

ويجرب الثايه يفغصها بيده وتصب العجينه
الثالثه الرابعه كلها مافيها حيله
قال من الي ملقم اللقيمات
عاد يقلبي امي بازه وفرحانه قالت اناااااااااااااااا
قال الله من الرفاله والله خخخخخخخخ كله من اعتمادكم على هالشغالات قالت امي هووووووووو<<<اهل الرياض
وراه وشفيها
قال ذوقي
خذت امي وحده وحطتها في فمهااا قامت العجينه ساحت بين بريطماتها
عاد تعالي شوفي الضحك
بس هاذي حوبه امي فيني انا واختي خذت تعبنا وجهدنا ونسبته لنفسها وعاقبها الله وهاوشها ابووي خخخخخخخخخ

(11)




انا اموت في شي اسمه طبخ من يوم كنت صغيره قبلي احوس في المطبخ مع امي وامي ياحبي لها تطردني لان مافي شي ينجح ابداا

مره سويت كيكه قبل ماتزوج وجيت فرحانه لابوي ابذوقه اياه قال يابنتي ذي لو يطق بها الكافر اسلم خخخخخ خخ ياااابسه

عاااد تزوجت وسكنت مع حمولتي واختكم في الله وجه بن فهره ماتنزل المطبخ بكرامتها جا ذاك اليوم سويت مكرونه بالباشميل من الساعه عشر الصبح في المطبخ ماخلصت الا 3 العصر الله من البربسه فيها يوم كلهوها لين نسيت احط الملح قالت خالتي ام رجلي وع ماصخه قلت عشان فيتس ظغط الله يحيتس ماحطيت ملح قالت اي بعدي بنتي خخخخخخخخ
ومره سافر زوجي لابها عنده شغل ورحت معه واول مره اتحمل مسؤليه المهم ليه صديقه زوجها ضابط ورايح ندب وانشب في حلق زوجي نسكن نفس عمارتهم شقق المفروشه
عاد ابسوي الغدا سوت لي صديقتي لحم متبل وحطته بالقصدير قالت بس دخليه في الفرن قلت يطول قالت اي لحم يطول
حطيته في الفرن من الساعه 7 الصبح وسويت رز بالربيان وكثرت المويه مره ياقلك مقلوبه ربيان يوم قلبتها في الصحن قال طششششششششششش<<<<مويه
جبت مناديل رووول وقعدت انشف الرز بالمناديل واللحم يوم طلعته مافيه الا عظام مادري ليه ولانتفه لحمه ماااع من الساعه سبع لين وحده الظهر مالقيت الا قصدير ناشف اسود وفيه عظام خخخخخخخخ

كل هذا عاادي مافيه الا رجلي لكن المصيبه جااايه

عند اهل زوجي شقه في مكه نروح لها كل رمضان وهاذي اول سنه لي معهم وزوجي عنده شغل في اخر شعبان قال خل نروح جده واذا جا اول رمضان رحنا لمكه

المهم رحنا لمكه قبل حمولتي وتقريبا بيجون في سابع رمضان
وخاله زوجي لها شقه في نفس العماره وبتجي ثاني رمضان هي وزوجها بس
وهي حرمه سنعه وتحب الزين وراعيه طبخ هي وبناااتها
قلت لرجلي ابسوي لهم فطووور ونروحه لهم عيب ساكنين بنفس العماره ولانروح لهم شي
<<<<من زين طبخي ياليتني انطميت بس
اكلم خالته يقول لها قالت خله عشا بعد التراويح
تحسب بيجيهم شي صاااحي خخخخخخخخخ
المهم يوم صليت المغرب واطلع ذيك الدجاجه من الفريزر ابي اقطعها عجزت ثلج
واقوم احطها على اللوح على بلاط المطبخ واحاول اكسرها بالساطوره تقوم الدجاجه تزلق وتتزحلق على بلاط المطبخ يقوم رجلي يشوتها برجله يرجعها لي خخخخخخخخخخ المهم تقطع لحمها وهي ماتقطعت
مير احطها في القدر واسلقها واحط عليها الطماط والصلصه والمكرونه وقلت في نفسي لين استوت قطعتها
<<<<<<مخ ذكيه
واسوي كريمه الخضراء ماغير واحط في الصحن شوي واحطها في الثلاجه الله من الدلاخه احسبها بتنتفش مثل الكيك لين حطيناه في الفرن
واسوي شوربه شعيريه ماجي<<<<هذا الوحيد الي فلحت فيها
واسوي سلطه واحط عليها ليمونها وخلها وكل بلاويها
مير ياذن العشاااء واطل على المكرووونه لين القدر مليان مويه قلت ابروح اصلي العشا في الحرم واعود على عشاااي
ولين بنت خالتي في مكه واتواعد انا وياها تجي معي بعد صلاه العشاء تساعدني وهي اردى مني والله في الطبخ
ونصلي العشا ونرجع والمكروونه مازالت مليانه مرق قالت الذهينه بنت خالتي خل نحط عليها علبه مكرونه ثانيه
بدل مانقلل من المويه حطينا عليها علبه ثانيه
ورحنا نصلي التراويح
عاد يوم رجعنا بنرسل لخاله زوجي العشا
السلطه اخورت من المغرب وهي مصلحه شكلها مصلحه من سنه
الكريمه يوم قلبتها في الصحن انفرشت صار عرضها سم واحد
الشوربه نجحت<<<<لو مانجحت فالمفروض مكاني شهار خخخخخخخخ
الشعيريه نسيت اعلمكم عنها طبختها وحطيت عليها سكر وكل شي بس استناها تصير بنيه عيت مررررره بيضاااء انعجنت وهي بيضاا بس ماروحتها لها يوم جا رجلي قال ليش بيضا قلت اهلي يطبخونها كذا خخخخخخخخ
المكرونه ومادراك مالمكرونه
نص عجين ونص ماستوى والدجاجه شكل فيها مرض متهذي لحمهااا قطعناها انا وياها
ومن قواه الوجه روحنا العشاء لها

والله يابنات حتى شكرااااااااااا ماقالت والله والله مالومها خخخخخخخخ انا نفسي حامت كبدي مافكرت اذوقه

حتى زوجي قال ليه مابقيتي لي اذوق طبخك قلت ماكفى وانا في نفسي اقول اخاف يجيك تسمم

نسيت فعايلنا في الدجاجه خخخخخخخخخخ
بس الحين اعجبكم صرت طباااخه

(12)

مره من المرارير اتصفح هالمنتدى الي تقول ليله حمرا والي ليله خضراء

والي ليله بحريه وقواقع الله لايستر لايغرقون من التحمس والي ليله غابيه ولبست لبس طرزان هي ورجلها ماشاء الله عليه طاعها خخخخخخخخخخ
المهم مير تتحرك مشاعر الغيره فيني قلت هالضعيف ماعمري سويت له ليلله
المهم اتحمس واقعد لي شهر استعد كل ماقلت ابسويها هالاسبوع قلت مالي نفس
اخر شي قلت يله خل نجرب ونشوف
وتعالي شوفي الاستعدادات مافي شمعه في ستي بلاازا ماشريتها ومفرش جديد وفرش حمام جديد مع الفوط
وقميص نوم ولبس وفستان نعوم يقالك ابلبس لبسين

عاد انا فيني عيب لو بروح مكه وارجع في نفس اليوم اخذ عيالي معي مستحيل اخليهم الله لايبلانا الي سشوفني يقول ماحد عنده عيال غيرها



المهم يوم جا العصر وراح للمكتب استحيت اقول للخدامات تفخو البلونات وتقعد اتفخ لين انتفخت لوزي مير يتطاقون عليها عيالي مابقى الا كم وحده

واروح اشتري الكيك والعصير وارجع البيت واحطه في ثلاجه جناحي مابي رجلي يشوفه واخاف عيالي ياكلونه خخخخخخخخخخخخ

وارجع اطلع واروح اصلح شعري واغلف الهدايا الي جبتها له
المهم وارجع البيت وصك علي باب الجناح ازبرق واصلح حسيت كاني في حفله نجاح خخخخخخخ
واتصلت عليه قلت له اذا قربت من البيت دق علي
عشان في نفسي اولع الشموع والحق اولعها من كثرها
المهم مادريت الا الي يقول تراني تحت ونسيت ادق عليك مير تجيني خرشه حتى الولاعه مالقيتها ويوم لقيتها اولع وهو يطق الباب افتحي
وانا اقول لحظه
واسمع ولدي يقول بابا مادري ليه ماما مقفله عليها من زمان خخخخخخخخخ
المهم اني تاخرت مير يعصب ابو الشباب قال افتحي عارف مسويه حفله شفت الكيكه

اثاري الرجال جا وانا مني فيه وفتح الثلاجه وشاف الكيكه وقرا وش مكتوب عليها



مير عاد تتحطم احلامي ترترترترترترن



مير افتح الباب وانا معصبه يوم دخل قام هو ولع النور خخخخخخخخخخخخخ يسفاب بس الشموع



قمت من الحره اطفي فيها وراحت ريحه الدخون والعود من ريحه الشموع



قال اشرقتينا بهالريحه



مير يقوم يشغل التلفزيون



عاد انا انطلق عليه انت الي فيك وملا فيك وماتستاهل مسيكن انقلب وجهه وقام يطفي المبات من الروعه ويولع الشموع هو يولع وانا اطفي

مير اجيب الكيكه واقعد عليها انا وعيالي ناكلها واشرب انا وعيالي العصير وهو يتفرج ماعطيته خخخخخخخخخ





ومن الحمق اغير والبس بجامه واقعد على النت وانا في نفسي اقول امحق رومانسيه عاد هو حس بتانيب الضمير بس وش عقبه



بدال ماتصير ليله رومانسيه صارت ليله مضاربيه




(13)

هذا موقف لاختي فريش توه من يومين





معزومه عند سلفتها وجامعه سلفتها السالفات الباقين

قامت اختي تبي اغراض مني عشان بتلبسها

ارسلت رساله ارسلي لي البس الفلاني والشنطه الفلانيه وجزمتك الجديده الي شريتيها يوم الاربعا خخخخخخخخخخخخ ولاتنسين الساعه الفلانيه
ترى عااد انتي خابره السلايف ومنافستهم ابي اصير احسنهم

وارسلتها لسلفتها خخخخخخخخخخ



(15)




انا مره سويت مقلب صغنون كنا نايمين في امان الله والغرفه ظلاااااااااااام دامس وانا كنت نايمه سمعت صوته يقوم يروح للحمام الله يكرمكم

مادري وش هالنشاط الي جاني قمت لبست عبايتي وغطيت فيها كل راسي وجسمي وجلست قبال باب الحمام متربعه

طلع هو يغافل لك الله ومعه فوطه ينشف يده من الروعه يوم شافني يحسبني جنيه بسم الله علي يقولي هشششششش هشششش بالفوطه
بس والله ياني كلت خبطه على راسي مالومه والله يقول خبري بك نايمه ولو يطيح البيت ماقمتي من ثقل نومك وش الله سلطك علي

خخخخخخخخ






(16)

بنات هذا الموقف لوحده تقرب لي تقول راحت لمجلس الامهااات مع بنتهاا ورجعت قبل بنتها





يوم جت بنتها من المدرسه تقول متفتحه مناخر بنتي من الفرحه قالت ماااااااااااامااااااااا البنات يقولون امك صغييييييييييييييييره مررررررره تقول قلت اصصص

لاتقولين شي بعدين لين جينا نتغدى سولفي علينا

تقول وانا على احر من الجمر متى يجي الغدى عشان زوجها يسمع المدح تقول يوم جلسنا على الغدا وتلفت على بنتهاا هاااااااااه ياحبيبتي وش كنتي من شوي تقولين يوم كنت مشغوووووووووله قالت اي صديقاااتي يقولون امك صغييييييييييييييييييره تقول وانا انتفخ راااسي اي كملي وش قالو بعد قالت بس يقووووووولون شييييييينه مررررره تخووووف خخخخخ تقول عاد هنا انفش راسها وطاح وجهها وزوجها كاتم ضحكته مايبي يفشلها خخخ مع انها والله حلوه بس هالبنات الله يفشلهم


وبث ..

من ايميلي العزيز هعَ