خلــــونــــــا نــتـــكــلــم..!!

صباح / مساء الكاديـ

انتشرت الكثير من الحملات في الفترة الاخيرة ومن الحملات اللى كان لها صدى كبير مثل (خلوها تصدي ) وهي حملة للسيارات ” واتوقع ان من حق الشعب ان يطالب بتخفيض الاسعار ولم يطلب شئ غير معقول “

والحملة الثانية “ خلوها تعنس “

وهذه الحملة اللى قاموا فيها مجموعه من الشباب السعودي احتجاج على غلاء المهور و………..الخ من امور الزواج …

ما راح نفكر مثل الحريم في المجالس واللى يقولون (( لية الولد مايوفر من راتبة اول مايتوظف وبعدين يجي يتزوج )) ؟؟

لو فكرنا زي تفكيرهم قولوا لي كم راح يوفر بالشهر ( 10ريال مثلاً ؟؟؟؟ ) ايش المصخرة هذي مافي احد يوفر في هذا الزمن لان الرواتب ماتكفي ” احد زملائي يقولي ان في البيت 6 رواتب تدخل بالشهر اخوانه وابوه وامه كلهم موظفين يحلف ان مايجي نص الشهر البيت شبة مفلس علماً بان الولد وضعه المادي جدا ممتاز وكان الموضوع مفتوح حول نقاش ان الفلوس مافيها بركة بهالزمن .. “

خلونا نفكر شوي ..

اذا قلنا الولد عنده مصاريف اقساط سيارة ” لنتفرض ان اهو اللى يدفع مش ابوة “
السيارة بكبرها تحتاج لبنزين + تغير زيت + كفر السيارة اللى كل شوي مغيرينه بسبب الشوارع السيئة + هندي توة يتعلم السواقة وصفق له سيارته ……………..الخ من التصليحات >> ولا بعد تبغون الحريم يسوقون على هالخساير
المخالفات المرورية ” وما ادراكم مالمخالفات ، هو لو يمشون على النظام ما صار عندهم مخالفات “
غسيل وكوي الثوب والشماغ في المغسلة >> لان الاولاد مايعجبهم كوي البيت .
عزايم مع ربعه >> من حقة يطلع ويروح مع ربعه يعني يحبس نفسة على شان يجمع مهر جعل عمرة ماتزوج …
مشتريات ( ثوب & شماغ & جزمة اكرمكم الله ) >> علما ان الاولاد بطلوا يفصلون ثوب فية فتحة للكبكات لان الكبك غالي لهذا السبب وجب التوفير على شان ” المهر ” وبطلوا الاولاد يفصلون ثوب الا من عيد الى عيد واذا رحمه ربي فصل لعرس اخوه ..
ولاتنسون ( فاتورة الجوال & اشتراك الانترانت & تفرمت الاب توب & العطر & مستلزمات كثيرة وابسطها كريم حماية الشمس ……………..الخ )

( واللسته تطول ….)

والقائمة كملوها لان ماعندي خلفية كافية للمصاريف …

لما يجي الولد يخطب البنت ايش على الولد انه يسوي :-

دفع المهر
شبكة + الدبلة + هدية حق العروسة ( وغير المصاريف الجانبية من الخرابيط )
هداية ايام الخطوبة ( يعني من حقة مسكين يهدي خطيبته هدية ايام الخطوبة )
اجار الشقة ( آآآآخ وما ادراكم ما اجارات الشقق )
تأثيث الشقة ( صالة + مجلس + مطبخ + غرفة النوم + غرفة الطعام ……..الخ ) >> حتى الحمام اكرمكم الله يحتاج للتأثيث
سفر ( شهر العسل على شان لازم قدام الناس ولد فلان سفر بنتهم وماتصير اقل من غيرها )
مصاريف العرس ( الصالة + الكوشة + البوفية + الطقاقة + تزين الطاولات + ……………………الخ ) ” يفلس الولد ويروح ياخذ بشت صديقة لان ماعاد عنده فلوس يشتري لة بشت ” ..

والقائمة اطول من كذا واكثر والناس اهم ادرى بطلباتهم اللى ماتخلص يطلبون من الولد …

لو فكرتوا في اول واحد ( المهر ) كم بيدفع الولد مهر ؟؟؟؟ خلونا نقول مايقل عن 50,000 ريال سعودي ( ريال ينطح ريال ) >> علماً ان الفترة الاخير كل الناس تعطي مهر 50 محد يعطي اكثر مع الوضع السيئ للمادة في البلد ،، واذا قل فيوصل حدود 35 الف ..

وكم اجار الشقة والتأثيث بيكلفة ( مستحيل اقل من 25.000 ريال )

خلونا نشوف رقم (6) كم تكلفة التذكرة وحجز الفندق والفيزا ( مستحيل مستحيل يقل عن 39.000 ريال ) وغير الفلوس اللى يبغاها على شان يشترون ..

::

ســـــؤال هل الشاب السعودي جالس على كنز ولا البترول يمر من تحت بيته او يمتلك الشركات الضخمة ؟؟؟؟

اعتقد ان الكثير لو فكر شويه بعقلة لصارت الموازين احسن ، عندنا مشكلة ان الناس لحد الان على تفكير العصر الجاهلي ان لازم الزواج يكون في افخم الفنادق وان لازم يتزوجون ولد الامير كما في قصص الاطفال وعلى سبيل المثال ( قصة سندريلا ) وان الفستان ليله الزفاف يكون من باريس والورد يجي من المريخ وغيرها من الاشياء على شان الناس تمدح وتقول زواج ( اسطورة ) ، الزمن تغير والزواجات صارت كثيرة لدرجة ماتشوف شكل الكوشة صارت الناس تشوف قلب اصحاب العرس ان كانت بيضاء وصافية او عليها طبقة من التكبر والغرور ،، لو تحضر زواج بالشارع ولكن اصحاب الحفلة يملكون الابتسامة والقلب الصافي من الحقد ومليئ بالحب ” راح ترجع البيت وتقول انه أجمل زواج ” ،، ولو نحضر زواج في افخم الفنادق والصالات واهل العرس متكبرين ” اقل من دقايق وراح تطلع وبتقول ياليت اني ماحضرت “) …

اما الشاب المتقدم لا يهم ان كان لديه 5 حسابات في البنك وكل واحد داخله ما لا يقل عن نص مليون ، لان الزمن هذا الفلوس تطير زي مايطير الريح وتختفي كما يحترق الورق ، مايبقى هو الأخلاق لا غير ” من العبارات اللى كنت اسمعها دائماً ( الفلوس تروح وتيجي ) “ …!!! [ يعني الواحد يشتري الولد مو يشتري فلوسة ]

من الغريب ان الناس لحد الان تسئل كم في حساب الولد او كم راتبة !!! [ عن نفسي احس عيب الناس يسئلون صح ؟؟ ]

المشكلة والى اليوم نشوفها بحياتنا الواقعيه وكلكم تشوفونها انهم يدققون على امور تافه مثل السكن حفل الزواج وشهر العسل المادري ايش اشياء شوية تافه ممكن انها تتغير في المستقبل والايام الجاية بس الشئ اللى مايهتمون له سمعت الولد وتفكيرة واخلاقة ولما يوفر لهم كل طلباتهم وتبدأ الحياة الزوجية ينصدمون بحقيقة هذا الانسان وايش بيغير اخلاقة بعد ماوفر لهم كل طلباتهم

- نفس المشكلة مع البنت يجون يخطبون لانها بنت فلان الفلاني ويتجاهلون تربيتها وتفكيرها ولما تروح بيتها وتتزوج البنت ينصدم الولد انها ماتعرف تحرك كاس الماي من مكانه وتحتاج لسنوات للتتعلم ويمكن ترفض التعلم وترجع بيت ابوها ” وخلوها تعنس ” ..

ويمكن تكون صدمة اكبر من انها ماتعرف تحرك كاس الماي ” ممكن ماتعرف تربي اعيالها تربية صالحة ” وهنا يكون الكارثة اكبر واعظم ،، لان كاس الماي ممكن يجيبون خدامة ، بس التربية وش يسون يجيبون مربية !!!!!!!!!

- لحد يجي ويقولي وش تقصد يعني مايدفع مهر !! لا طبعاً يدفع مهر بسلامته ويكمل كل الاشياء اللى عليه من باب تكريم الإسلام للمرأة وحفظ حقوقها ولكن اللى ابي اوصلة لكم من هذا الموضوع هو الناس للى تتشرط وتطلب طلبات مالها اي لزوم وداعي ياليت يكون تركيزهم على الاشياء المهما والاساسيات ، مو يخلون الولد يبيع بيت ابوة على شان هالمصاريف …

* ما كتب بالموضوع مو كلة يعبر عن رأي الشخصي وانما جزء منه والباقي احتفظ فية ، واحترم اراء الاخرين ،، لان هالموضوع تناقشت فية مع الكثير من قبل أن اطرحة وقالت لي وحده من البنات [ والله ماعنده فلوس وبيسكني مع اهله يجلس عند امة تربية ما ابغاه ] اما الثانية قالت لي [ خيييييييييير يعطيني مهر قليل ولا حفلة زواج لا يا ماما يدور غيري ] وفي ناس بالعكس كان تفكيرهم واقعي مع حياة المجتمع ان الحياة غالية وصعبة ومو زي قبل (( الاراء تختلف وتتفاوت وكل انسان ولة حريته )) ....

الــحــوتــ