هواجيس مسافر

سلام من نوايا القلب الى بحر الغلا والشوق = يعدل خافق زادت طواريقه على مغليه
سلام من خفايا الجوف الى شخص غدا معشوق = يرطب نسمة المحبوب وياخذني على طاريه
ويرميني بجو الحزن ويكوي قلبي المحروق = واتوه بعالم بعته يرجعني عشان اشريه
حكاية حبنا صفحة بدايتها سلام وشوق = تضم أكبر أمانينا ولا به شي ما نطريه
وتاليها تحن الروح وانا في حالتي مشفوق = على قلب عطى نبضاته لشخص غدا جافيه
الا يا سامعين الشعر وذواقة حلاه بذوق = انا لي صاحب جافي ولي حب ما عاد ابيه
لبان صرت في فمه الا حسبي على باطوق = صنع له علك من قلبي ولا يشره على راعيه
مشينا من رياض المجد وجهتنا ديار فوق = نبي صوب الجنوب اللي تعلق نجم في عاليه
على مركوبة تلحق بمشيتها نظير الموق = تعذب من يسايرها ويغليها بما يغليه
وانا في رحلتي لاني على بعضي ولا مطفوق = مغير الحن أشعاري وأغنيها مع التشويه
يذكرني هبوب الريح في بابي بذكرى العوق = وأنا في مشيتي راكد على درب متى بطويه
يرافقني خوي الروح نمرح بالهوى والشوق = ولا نترك طريق الهم يدخل في جبال التيه
ويقول ارجوك لا تسرع على دربك وسوق بذوق = وأنا من نشوتي ماشي وطبلوني ماناظر فيه
خذاني طيف من حبيت وقدامي تلوح بروق = على نية صفي النفس ولا يخفاك بيض وجيه
يشيلون الهموم اللي تزعزع في دما وعروق = ويطوون الحزن وآخر معاناتي وانا راجيه
ذبحني خافقي يشكي وهو في قلبي المطقوق = وأقول أرجوك يا خافق تراني بتركه واجفيه
عشان الحب لا تبكي ولو كان الهوى محروق = ترى ذلتـك تفكيرك بماضيكم على ماضيه
وفجأه صوت يزهمني يقول احذر تراك تسوق = واناظر في الخوي وأدعي عساه يوفقه باريه
وباطلع عن مواضيعي وبأنصحكم مع التشويق = ترى الرجال ما يمشي بدرب مادرى وشفيه
واذا كان الفقر سبه واذا ثوبك غدا مشقوق = ترى الدنيا وسيلة نقل للأخرى بها تمويه
وأنا شاعر أعيش بجيل فيه الذيب وابن صفوق = قصايدنا كتبناها ولابه شي قد نلغيه
وابن قضعان والبيشي وبشكة من رعاة النوق = إذا ما هزنا الخافق كتبناها مع التنويه
يهيضنا هجير الشمس وضيتها بوقت شروق = ويغرينا ظلام الليل و نو بالسما يغديه
وأخيرا طالت القصه على قلب رقد مدقوق = ولكن عذري النشوه وهم بالضلوع أخفيه
وبشكركم وأنا ملزوم عالإنصات والتصفيق = وبأنهيها بحمد الله عدد خلقه وما يعطيه