~ حكاية عمر ~ ابراهيم الشيخي

بسم الله الرحمن الرحيــــم


قصيـــدة ~~ حــكــآيـــة عـــمــر ~~
لشاعر المحاورة والنظم / ابراهيم الشيخي

طال انتظاري والمشاعر شكل غير ولون غيـر=والساعـة الرقميـة اذهلنـي جمـود ارقامهـا
الطاولة كتلـة خشـب والشمـع بلّلهـا زفيـر=والزاوية خجلا تعبـر عـن مـدى استفهامهـا
والفجر في قمة جبل مصلوب للأمـر الأخيـر=والليل سلمنـي نجومـه واحتطبـت عظامهـا
والريح قيثارة على الصامت لها موجة صريـر=تتنمل اطـراف النوافـذ مـن رفيـف انغامهـا
ميلادي الرابع وعشريـن اقبـل بخيلـه مغيـر=ضيفٍِ كسر قيد امنياتـي واعلـن استسلامهـا
تارك وراه انفاس مـرت كـل مافيهـا مثيـر=هلت لها عيني وانا استرجـع شريـط ايامهـا
تساقطت في هيئة اوراق الخريـف المستجيـر=من عاصفـة تستعبـد اوراقـه بسـن فطامهـا
وحيد واعشق وحدتي والناس من حولي كثيـر=حتى ان فوق الارض يزعجني دبيـب اقدامهـا
اهبط على سور المدينـة ليـن أولعهـا سعيـر=وارجع واشيدها مدايـن مـن بقايـا حطامهـا
لو يحسبون اش كثر مافيني من الحزن المريـر=دخلت موسوعة قنس واجتزت كـل اعلامهـا
تمرد افكاري يسافر بي علـى جنحـان طيـر=حتى يوصلنـي مجـرات السمـا واجرامهـا
راسي هناك وألف كوكب حول راسي تستديـر=متفاوتة مابيـن كبـر وبيـن صغـر احجامهـا
مالي مساحة تحتويني من هذا الكـون الكبيـر=نفسي تمرجـح بيـن واقعهـا وبيـن احلامهـا
اثر البشر ماردها عن حـق تحديـد المصيـر=الا مسافـة حـرف بيـن آمالـهـا وآلامـهـا
هذة حكاية عمر اسطرها على لوحـة حريـر=رسامها كـف القـدر ماهـوب انـا رسامهـا
ميلادي الرابع وعشرين انت ضيف وضيف غير=صحيفتك بيضا ولا ادري وش تخـط اقلامهـا
عسى السنين اللي طواها البين تذكرنـي بخيـر=والله يصبرني وانـا استرجـع شريـط ايامهـا

تقبلوآ أطيب التحايــــــآ