نصيحة لكل ثرثار سليط اللسان !

ركـبّـت من فكري تراكيب وهجوس=اقولها والقصد للي درى به
بعض العرب هرجه غريبٍ ومنكوس=ما ياتي الموضوع من عند بابه
في السالفة يلف ويدور ويحوس=سوالفه جت بالملل والكآبة
احسن لبعض الهرج لو ظل محبوس=لا صار ما ينفع ولا ينبدى به
كلمتك مثل السهم يرمى من القوس=ما عاد ترجع والخطا له حسابه
خل اللسان بداخل الفم مدسوس=خله مثيل السيف داخل نصابه
بعض الهروج العوج تقضي على نفوس=كم واحد سبّـب بقوله عذابه
كم واحدٍ عوّد وهو حيل متعوس=شاف الندم باسباب هرج ٍ حكى به
ويعض فوق اصبعه باسنان وضروس=ويقول ياليت القدر قد غدا به
ترى العمر ياناس دقات ودروس=يدري بها رجل ٍ رشيدٍ ونابه
واللي حفظ قوله من النقد محروس=ما يلحقه لوم العرب والعيابة
وفي الختام الحمد للي له الروس=تذل له طاعة وقدرْ وإنابة
وهذي نصيحة ما ابي لاجلها فلوس=اسمع كلامي كان بالعلم تابه
الصمت للرجّـال هو خير ملبوس=يحفظ له الهيبة ورفعة جنابه!