يارفيقي تعلل من كلام ضمانه

يارفيقي تعـلل من كلام ضمانه
ومن تجارب حياةٍ لبّستنـا حللها

الكرم والشجاعه والصدق والامانه
هي نوادر صفاتٍ ليت كلٍ حملها

والبخل والجبانه والكذب والخيانه
خـاب فعله وصيته واحدٍ زابن الها

المكانه تجي لك من رفيع المكانه
والصغاره تلوبك لآ نزلت لوحلها

المواقف تحط الكل رجال خـانـه
والحمول الثقيله مالها الا جملها

بعضنا بس حديثه في فلان وفلانه
لو تفكر بحاله انشغل في عللها

وفيه من قالوا انه من رجال الرزانه
ودّعوا لي الرزانه كان هو من نقلها

كتّفوا لي اليدين وربّطوا لي لسانه
ارهقتنا المجامل واشغلونا سفلها

والله ماظلل الحكام غير البطانه
والا بعض المناصب حِيلت الغير اهلها

اسعد الله وقت اهل الحكم والفطانه
واسعد الله منهو مستظل بظللها

يارفيقي وكلٍ في طريقه وشانه
ومن يراقب طبوع الناس يلقى زللها