تغريدات (2) ...

تغريدات (2)

لا عاد حسّادك من اهل وقرابه
من كيدهم ذقت البلاوي والاوجاع

فالمرّ يذبح لا تكثّر شرابه
وإن ضاقت الدنيا فجوج الله اوساع

# ابو فارس #

******************
يقول من لاقى معاناة و اجراح
ومجربٍ سوق الفلس منذ مدّه

من ظنّ في الاسهم مغاناة وارباح
مثل الذي يعطي الحرامي بيدّه


# ابو فارس #

******************
من علّق اعلى دنيته كل الامال
و يظن فيها لا استوت له شطارة

مثل الذي يبني على جرف منهال
بأيات لحظة ينهدم به جداره

# ابو فارس #

*****************
حن كذا يا معشر الشعب السعودي
بالمواسم بين سلخٍ و ازدحامي

في السعة و الرخص ما تلقى وجودي
وننبسط لا صار فينا الموس حامي

# ابو فارس #

*****************
يالله توفقنا رجا ليلة القدر
يا واحد بيديه تصريف الاقدار

و اكتب لنا في الخير ما يشرح الصدر
واختم لنا الاعمار بالعتق مالنار

# ابو فارس #

*******************
الدين ما هو بس منظر و ديكور
الدين مخبر في التعامل و الاخلاق

لا تنخدع في الشكل لو كان دكتور
و الطيب لا تستغربه لوه حلاق

# ابو فارس #

*******************
الشهر يا اهل الخير يبكي وداعه
عسى الولي ذي المن يقبله منا

عساه في الميزان ثقل و شفاعة
و يعود باحوال على ما انتمنا

# ابو فارس #

*******************
يا احفاد بن ملجم عليكم من الله
من الخزي و اللعن ما تستحقون

هذا فساد الدين ما هي مغالاة
و افكار ما تطري على بال مجنون

# ابو فارس #

*******************
الحمد للي يبسط الرزق و يتوب
ما هب نسناس و ما دن رعاد

لوكان غير الله من الناس مطلوب
كنا هلكنا بين ظالم و حساد

# ابو فارس #

********************
سبحان من يبقى على حال واحد
و تشوف خلقه كل يومٍ على حال

شخصٍ تودّه يصبح اليوم جاحد
و تودّ شخصٍ ما خطر لك على بال

# ابو فارس #

*******************
كم حاجةٍ تطرد وراها ولا تجيك
و تجيك حاجاتٍ لحدِّك عجيبة

هي خيرة الله .. ذا كِتب لك بياتيك
ما احدٍ بها الدنيا خذا الا نصيبه

# ابو فارس #

*******************
كل الجمايل يثيب الله راعيها
الا جميلٍ ينافي الخُلْق والدينا

صنايع الطيب لا تُعدم مساعيها
ما تزرعه تحت الارض اتشوفه العينا

# ابو فارس #

*******************



و سلامة روسكم. ،،،،