ديوان الشاعر محمد بن لقفص حكيم الشعر

ياخوك بعض الناس ما عنده احساس
الله يعين أرض عليها تشيلــه

أنشهد إن الناس يا خالد أجناس
فيهم سنافيّ وفيهم هبيـــلــــة

فيهم شجاع سمعته ترفع الرأس
وقت الشدايد ذاك يسوى قبيلة

كنه حفيد الزير سالم وجساس
سيفه على كتفه ذراعه طويــلة

كريم سبلا يذبح الرأس لرأس
ماهو عن الضيفان نفسه بخيــلة

نفسه رفيعة ما وضعها للدناس
ولا رماها في دروب الرذيلــــــة

ممشاك ياخي صف هذاك نوماس
درعك سنادك طير شلوا زميلـــه

واما الردي ماله الناس مجلاس
نفسه في المجلس تراها ثقيلــــة

هذاك ما قربه إلا تراء بأس
حتى ولو كانت هروجه جميلـــة

ما توزن أنواع المعادن مع الماس
الماسس مافي السوق ياخي مثيلـــه

الماس له جودة وقيمة ومقياس
وأنا عليه عهد ما أرضى بديلـــــه

للمر كأس وللحلا يافتى كأس
والعقل عندك عده أكبر دليلــــــه

فكر وميّز بين طيب وبلاس
واحذر ضعيف النفس لا تنتمي له

صاحب عريب الأصل وابحث عن الساس
تراء الأصالة مثلما هي أصيلــــــة

ابحث عن الطيب تراء العرق دساس
وابعد عن الفاشل عسى الله يزيلـــه

لا يخدعك من له جنود وحراس
ترى الخدم والمال ياخي وسيلــــة