غرابيل

غرابيل الدهر عيت تخليني اعيش انسان
نويت أنجن من زود الهموم ويالله الخيره

كثير القى من الزفره وسط صدري بلى عنوان
من الضيقه تتوه بعالم الآهات / والحيره

احاول بس اوصفها علاج الضيقه الكتمان
تصبر به ولا تدري نهاية عمرها سيره

كتب فيها معاناته وصار الصدر له جدران
مسح فيها ضلوعي لين بانت به طباشيره

غرق وقتي وانا مدري وسط غبه من الاحزان
قطعت انفاس في صدري رغم كثرة محاذيره

رماني وقتها مرهق على شاطي من البركان
ابي اوقف / ولا كنه حرق رجلي بتأثيره

الا ياحضني الدافي دفاك اسبابه النيران
وسط جدرانك البيضاء فلاشاته وتصويره

صعب تلقى بهالعالم حضن ويكون لك بستان
والى منك لقيت انسان بانت لك معاذيره

هلابك ياظلام الليل هلا ياعالم النسيان
هلابك يارفيق العمر ياحلمه وتفسيره

كثير اشتاق لك بالحيل وانا اللي صرت بك ولهان
تصالحني تواسيني تراعي عشرة / الجيره

نشف ريقي من الوحده وانا اللي للقى ضميان
عجزت اوصف معاناتي تعبني حيل تبريره

انا عشت الوهم وحدي ادور للوجيه الوان
اسافر في وجيه الناس ادور لي لتأشيره

متى القى لي وطن واحد تعبني كثرة الاوطان
من اللي شفت في دنياي لا كثرت تعابيره



وسلامتكم