جبـال تطولهـا وجبـال بعيونـك تخايلـهـا

معوّض خير ياحيٍ تهقوى في الزمـان ومـال
سنينك لو رقيـت بعدلهـا يطرحـك مايلهـا


تعلّم وإعرف إن الدرب قدامك سهـل وجبـال
جبـال تطولهـا وجبـال بعيونـك تخايلـهـا


ومعوّض خير ياحيٍ وردت الماء بدون حبـال
يطول بك الوقوف وشربة المـاء ماتحصّلهـا


وقوفك عند راس البير مايسقيك لـو فنجـال
ولاينفعك شوف الجمـة اللـي منـت طايلهـا


ومعوّض خير ياحيٍ خدعك من الرجال أشكـال
تشوف أشكالها وتحطها أرفـع مـن منازلهـا


تعلّم من زمانك لاتصير مـن أجهـل الجهـال
ترى في كل يـوم تجيـك عبـرة لاتجاهلهـا


إذا ربي وهب لك عقل تلقى في الرجال رجـال
تعرف اللـي يطلّـع قيمتـك واللـي ينزلهـا

ترى من بعض مايندي الجبين ويحرج الرجال
لياسـاق الميانـة فـي نفـوسٍ ماتقبّلـهـا


ومهما شفت في صاحبك من نخوة وطيبة فال
ترى بعض السجايـا كثـرة الإلحـاح يقتلهـا


معاريف الرجال ديون وديون الرجـال ثقـال
لياصرت متعافي ليش تغـرق فـي جمايلهـا


رصيدك في حياتك سمعتك مع طيبيـن الفـال
رجال الطيب والمعروف بالمعـروف عاملهـا


ولاتبدي بجاهـك فـي مقـامٍ مايسـر الحـال
ولاتشفـع لنـاسٍ ماتنومـسـك بفعايلـهـا


لياجاتك تعذّرهـا مـدام العـذر لـه مدخـال
ووقت الجد قول لهـا الصحيـح ولاتجاملهـا


وخذ منـي نصيحـة لاتصـدق كـل ماينقـال
يجـرك للنميمـه ليـن يطرحـك بحبايلـهـا


يجيلك ناقـل النمّـات بهـروجٍ تغـث البـال
سوالف في قفاك وحظك أطيب يـوم تجهلهـا


يبـرر بالحميـة والصداقـة شينـة الأفعـال
يجمّـل صورتـه بعلومـه اللـي ماتجمّلـهـا


ولو كانت حمية فيك رد المخطيه فـي الحـال
ولاكان إستمعها فـي قفـاك وجـاك شايلهـا


ترى من جاب لك ودّى وهذي عـادة النقـال
يحاول يقتنص من فمك كلمـة لأجـل ينقلهـا


ومثل ماقال عندك راح عنك وعند غيرك قـال
وزوّد عشر فوق الكلمةاللـي كنـت قايلهـا


تجنّب مجلسه لاتجلس إلا مع كريـم خصـال
تحمّـل ميلتـه وإن ملـت ميلتـك يتحمّلهـا


ولاتصبر على الجار الردي لوهي ثلاث ليـال
تضـرك جيرتـه لوكـان بيبانـك تقفلـهـا


وبيع الدار بأول سومةٍ تعرض علـى الـدلال
ورزقـك عنـد ربٍ كاتـب اللقمـة وكافلهـا


وبنتك لاتزوجها الردي لوهـو كثيـر المـال
تربيهـا علـى الطـالات وتشـوّه سلايلهـا


وكم من لاش يرمي خيبة إبنه فوق راس الخال
لوإن الخال من روس الرجال ومـن دلايلهـا


ليامنك عرفـت تميّـز الطيّـب مـن البطـال
وفادتك التجارب في الحيـاة وفـي مسايلهـا


وكشفت الفرق مابين الصحيح وحيلة المحتـال
وتعلمت الفراسة في الوجيـه اللـي تقابلهـا


بعد هذي ترى مالك غنى عن صحبة العقّـال
يدلونـك بـرايٍ ينقـض الدعـوة ويفتلهـا


يقولون الرجال اللي سوالفهـم حِكـم وأمثـال
ليامن ضاعت الحيلـه يـدل القـوم عاقلهـا


نصيحة واحدٍ جرّب وشاف من الزمان اهـوال
يقدّم لـك خلاصـة هجـرةٍ جـرّب هوايلهـا


اعجبتني ونقلتها لكم وما عرفت قائلها