وهذه قصيدة أخرى للشاعر سعيد بن ذياب وهي بعنوان
(_ ديرة عسير )
يابن فيصل حفظك الله يابن الأكابر = ياقوي العزوم اللي معلمنا الجسارة
سامي الفكر محمود السجايا والمآثر = راعي واعي يعمل لياله مع نهاره
أرتكى للحمول وشالها مخلص وقادر =يبني المجد والتطوير تارة بعد تارة
لين صارت عسير أنشودة الطير المهاجر = جوهرة حسن رباني رفع ربي عياره
ديرة في روابيها شعور الأنس غامر = والرضا فوق ساكنها عن الضيقة دثاره
تضحك الغيمة الوضحا على خضر المناشر = فاندلع ريقها الصافي على الضلع وخضاره
جنة الله في أرضه وهبها كف ماهر = فاكتسى الحسن روعة واكتسى الماهر وقاره
رايد للسياحة في جمال أبها مسافر = ذوق واحساس وابداع مسماها إماره
السياحة صناعة قالها ما هوب حاير = واثق الرشد والتخطيط في صايب قراره
قالو الربع لأوروبا كفخ بالشوق طاير = قلت حاشا وأنا في ضيفة الشيخ ودياره
أرتدي الأمن والإيمان وامر الدين ساتر = واتلذذبنسمات الجبل فخر ونعاره
أشرب الحب من داري عسى ذا الدار عامر = واقطف الورد والكادي وريحانه وشاره
أتقهوى سواليف الغضنفر من تماضر = واكتب أشعاري لعين الهنوف وعين ساره
واتعلل مع مرحب وتسلم لي وتامر = مجلس يعمره طيب وغلا وأحلى عباره
من التلفريك أناظر في طريق الجد ساير = بين صخرة وشجرة خطوة العز وآثاره
في بلاد لها بالطيب مخبور وخابر = والكرم والمكارم لاهلها طبع ومساره
في ذرا الفهد للتوحيد نصار وناصر = ذخرنا فخرنا حامي حمى شعبه وجاره
وابو متعب وبوخالد مداهيم المخاطر = فرحة الدار في يوم تحف به المكاره
ملاحظة : هذه القصيدة قيلت في عهد الملك فهد رحمه الله