ياقلب لاطوّل قساها لياليك=اصبر ترا ماحدٍ من الهم خالي
كم من فقد له غاليٍ مثل غاليك=واقفى يجر خطاه ماهو بسالي
احترت مادري كيف ياقلب اسليك=حبيت والي راح بالحيل غالي
ودعك عقب البعد جرحٍ بقى فيك=ينزف على ذكرى الليال الخوالي
ذكرى تجيبه لك وذكرى توديك=والسد ما بين المواصيل عالي
ياغايبٍ من غبت ماغاب طاريك=في كل ليل يعذب الضيق بالي
افز من غفوات نومي واناديك=كنك قبالي وانت مانته قبالي
واقول ياقلب العنى ليش وشفيك=اللي تنادي صار وصله محالي
"
"
"
"
بقلمي
بدر