سلام للمسلم سلام وتحيه
اللي على شانه لفينا نشارك
مواسم عظمى من الله هديه
في كل عام يحلّ شهر مبارك
واقول يا مسلم فعولك جليه
لكن صومك يتّضح في نهارك
لا تجرح صيامك ونفسك مطيه
لو سقتها للخير يصلح مسارك
وان سقتها للشّر بين البريه
يميل ميزانك وينزل وقارك
وإن كان صومك ما يكفّ الأذيه
وش فائدة صومك وهذا شعارك
وهذي نصيحه ما وراها جزيه
يالمسلم الصائم تلمّس لجارك
يمكن يكون بحاجتك في عطيه
أعطه ولا تبخل تراها لدارك
هذا وسامحني بحجم الوصيه
والسالفه سهله ويبقى قرارك

غرمان بن عزيز العمري