منتديات بني عمرو - عرض مشاركة واحدة - ديوان الشاعر صالح بن علي بن غيثان .... (العرضه والنبط )

09-12-2011, 12:13 AM

من جديد الشاعر صالح بن علي

جديد النبط ..26/5/1432 هـ

الى سعود ال محسن

انا لي صديق قدم الطــــيب من يمـــــناه
ولي عام وانا احـــــــاول القاه وافضاله

عطوني القلم واكتب له الخــــط ثم اقراه
واعزز بيوته واهب الحـــــــــر مرساله

سلامي لبن محسن سلام(ن) على معـناه
من القلب نهدي له سلام(ن)يــــــودا له

يودا له على جيب حـوض لوصفـــــــناه
ما ينصاه من نوعه ويفرق عن اشكاله

الفين وسته مرنه واحـــد يهـــــــــــــواه
ولا شد بدو ولا سحب قلص نحــــــــاله

ولا طلع به مخـــــــــرز وعدا به الملقاه
وعدا جمح والسيل مالجاله إلجــــــــاله

ولا لف به لحــــــجاب وعلى جرب نحاه
وحول على فرش السكب عقب مقيــاله

ولا قد شبك سنه مع طـــــــــــلعة تحداه
على منكب الصلبه ولا شنــكر حبـــــاله

يصونه عن الوادي ومن محجـر يعضاه
ويوزن مراياتـــــه على قدر مــــــدخاله

على ذكر بوم شعاب ويعيش مــن سماه
شخصــــية عــــروس في مقفاه واقباله

تلافت له الانظار في جيته و قــــــــــفاه
اذا مستدار وضـــــــــــاق بالخط مدقاله

يهايط كما استعراض فحل يعد خـــــطاه
هدود مع الفصام لبل (ن) تحـــــــازا له

اذا شافه القاضي ولا قال ما شـــــــــالله
خطير على القاضي تجـــــي حالته حاله

من اقصاه حتى ادناه وادناه حتى اقصاه
هو المال ولا وشــــهو المـــــــال ورياله

اذا ما غدا في ديــــــرة صاحبه ويــــــاه
الى كنه يسولــــــف معه ويتــــــحاكى له

بريمي خليجي كل من يركبه غـــــــــاناه
الى دق سلفه يطـــــــــرد الفقر من حاله

فدا صاحبه والرنجر روفر عساه فــــداه
وعسى صانعه في جنـــــــة الخلد منزاله

مشى مالخيالة مغرب والمســـــــير دواه
تعدى النقيع الساعه سبعـــــه على فاله

مسك خط رنية واستوى الليل في مسراه
يسلي ضمير معـــــــــاونه ويتهـــــنا له

تعدى الرياض الساعه وحده ولا طــــفاه
يفلل وقـــــــــوده والبلـــــــوفات شغاله

يبي الحفر قبل يطلع الصبح من مبــــــداه
وصل بالسلامـــــه واخبروني بميصاله

وصل عند راعي الجود والمدح من صباه
عزيز النسب من جــــــده وبوه واخاله

سعود ابن محسن وال محسن كرام الجاه
لهم ماضي كلٍ يسولــــــــف عن افعاله

رجال كما بو زيد ما واحــــــــــد يقــــواه
يا كم موقفٍ صعب قـــوي تصـــدى له

والاخوال والجدان منــــــبع كرم ودهاه
ما ياصل مواصيل ال حمـــران وصاله

رجالٍ الى شـــــــد بهـــــم الظهر واعزاه
غدو للحميه بين خيــــــــل وخيــــــاله

ويرجع في ال الشيخ صون البلد وحماه
شيوخ على جور الزمـــــان وتحمــاله

سيوف لبن جاري الى قــــــال وفيـــــناه
جمال تشيل الحمل لو جارة اثقــــــــاله

نصينا سعود وراعي الطيب ما ننســـــاه
كريم شجيع والمراجــــــل تعنـــــــا له

رجالٍ الى احتاجوه ربعــه واحتجـــــــناه
يسد اللزوم وكلٍ يقـــــــول تكــــــفا له

حميد الصفات اللي على روســــنا هبناه
عسى الله يكثر في الرفــــاقه من امثاله

ابشكي عليك الحال يا اعـز من ننــــصاه
ولو كان غيرك واحدٍ مشــــــــــتكينا له

لكن انت لمنه عرف لازمــــــي قضــــــاه
ولو كان ياهب من حلاله ومن مــــــاله

وانا ادري ان ما يحتاج لك يا سعود وصاه
لكن اكثر العالم جواسيـــس محتــــــاله

من الصاحب اللي لا مثيله ولا شــــــرواه
في جنوب نجد وفي ضواحيـــه وشماله

حبيب يطاوعني وكنت امره وانهـــــــــاه
ولو ما طرى لي حاجة جــــت على باله

حداني الزمان الشين الاقشر على فرقـاه
ولا عاد حتى ينعرف رقـــــــــــــم جواله

وهو يعرف ان والوعد والعهد ما خنـــاه
وكم ليله من دون قمــــــرا تعبـــــــنا له

تحياتي وشكــــري وتقدري المهــــــداه
الى بو طلال ومن بني عـــــــمر تهدا له

وسلامي عليك اول سلامي يسوق اتــلاه
وسكر على سر المحبــــــــين بقـــــفاله

واصلي على محمد وصحبه ومـــن والاه
عدد من تبع سنة نبـيه وصـــــــــــلى له