السهر مقسوم يالعيـن الشقيـة=لو تبين النوم قلبي ما يطيعِ
المنـام اليـوم مالـه قابلـيـة=دام قلبي بالحشى يخفق سريعِ
ما ينام وعيشته ماهـي هنيـة=لحظة ابعد عنه منهوله ربيعي
ابتعد واصبح صعب علي مجية=ولو هو ابعد منزله عندي رفيعِ
مستحيل البعد يالعين الرضيـة=يستطع يمحي بدر حب طبيعـي
من وفايا العين ما بقي له وفية=الوفا بشريه واخلص له مبيعِ

من يقول الزين ما يكمل حلاه=كل شي فـي حبيبـي اكتمـل
الله اللي كملـه والله عطـاه=ما بقى للزين في خلي محـل
العيون أحلى من عيون المهـا=شافها قلبي وصفـق واحتفـل
نظرته من فتنته شعلة حيـاه=والجفون من الحيا فيها كسـل
ساهمن رمشه على الخد وسناه=كن لمعة وجنتـه ورد وطـل
والشفايا كنها جمـر الغضـى=تحرس الريق المحلى بالعسـل
والشعر ليل نقل حمرة مسـاه=اجعد حوّل على صدره همـل
مايج من فوق متنه ما طـواه=لون شلال مع المغرب نـزل
انطلق جيده يماري في بهـاه=فوق ميـاس تعـدل واعتـدل
بالرشاقه فيه من ظبـي الفـلا=لا مشى كنه على الريح انتقل
ريحته من كل زهـر منتقـاه=والزيـاده للخزامـى والنفـل
صافي مثل المطر فوق الصفاه=باسمٍ مثـل البشايـر والأمـل
جامع من كل زيـن منتهـاه=مستحيل الزين في خلي سهـل
كايد ماهو يليـن لمـن بغـاه=يرتفع عن كل سقطات الزلـل

يا حبيبي شرهة العاشـق كبيـرة=كلمـا زاد الغـلا زاد العـتـاب
القليله من هـوى بالـي كثيـرة=والكثير من الذي غيـره هبـاب
تحسب ان جروح مفتونك صغيرة=جرح قلبي من هوى قلبي عذاب
انكسر جناح قلبي فـي مطيـرة=والجناح إلى انكسر بالطير عاب
والليالي يا قمـر ليلـي قصيـرة=لا يضيع العمر في طرد السراب
اشتكي وجروح قلبي من عشيره=يا عشير القلب في قلبي صواب

عطني في هواك الصبر لا صرت قاسي = ردي للحنان وداخل القلب جبار
ما دام قلبك خالي الحس ناسي=تلعب على المشتاق بوعـود وأعـذار
ما أطول فيك من الامل كثر ياسي=وعندك هجيل وتارك القـلب محتار
ما يستحق العطف قلب المأسي=اللي رضى باللي قضت فيها الاقــدار
لامن نسيت ولا نويت التناسي=فترك وراك البـاكي لعـيـني تـذكـار
أشرب معها الوهم لا جف كـاسي = ولا حـصـل شـوفـك أضـمـك بالافـكار
يا محرمٍ عيني لذيذ النعاسي =ومـسـاومٍ بـالـروح جـنـتـك ونــار

المها والريم في حفظ ومصونـة=ماعليهن من مديريـن الدوايـر
حطهن سلطان في داخل عيونـه=ولفهن بسياج عطفه في السراير
في عيونـه مايشوفـن المهونـة=يشربن الريح في رووس الزباير
ياعنود الصيـد ماانـتِ مغبونـة=في كنف سلطان ماذيّـرك ذايـر
تبشرين بلمسة العطف الحنونـة=كلهـا ياريـم فالـك والتفـايـر
العهد سلطـان لايمكـن يخونـه=من رجالٍ مايعرفـون البوايـر
الأمـان اليـا عطـوه يوثقونـه=بالوفـاء ويسجلونـه بالضمايـر
ارجهني فـي بـلادك يافتونـة=وارعي الريضان من حاير لحاير
مدهلك يوم القنـص ماياصلونـه=يفركون كبودهم وجد وحسايـر
أبوخالد من ورا حـدك ودونـه=واقفٍ للـي يديـرون الدوايـر