لا تشتكـي مـن جـور الايـام للـنـاس =ادفن همومك في ثرى الصمـت كلـه
أسرار عمرك خلهـا تحـت الانفـاس =لا صــار هــراج القـفـا فـاطـنٍ لـــه
هذاك يفرح لا لمس جرح الاحساس =وهــذا منـاهـي لا لـقـى فـيـك عـلــه
تعيش بالوجـدان مـا عـاش هالـراس =لولاك قل لي ويـش انـا عايشـن لـه؟
إن زانـت الايـام يــا شــوق لا بــاس =ولا صـبـرنـا لـيــن ربــــك يـحـلــه

قالت من إنت وقلت مجموعة إنسان = من كل ضد وضد تلقين فيني
فيني نهار وليل وأفراح وأحزان = أضحك ودمعي حاير وسط عيني
فيني بداية وقت ونهاية أزمان= أشتاق باكر وأعطي أمسي حنيني
وأسقي قلوب الناس عشق وضميان= وأهدي حيارى الدرب واحتار ويني
وأحاوم طيور السما حوم نشوان= واسيّل الوديان دمعي حزينِ
في عيني اليمنى من الورد بستان=وفي عيني اليسرى عجاج السنينِ
تهزمني النجلا وأنا ند فرسان= واخفي طعوني والمحبة تبيني
إن ما عرفتيني فلاني بزعلان=حتى أنا تراني احترت فيني

مساء الخير والاحسـاس والطيبة= مسـاءٍ مـا يـليق إلا بأحبـابي
مساءٍ غير غصن الطير يحكي بـه= عن اللي مـسكنه جفني وأهـدابي
هلا باللي أحـبه كثـر تعذيـبه =وكثر ما هـو يغيب وكثر ترحابي
حبيبي هـو ولو ما قصّـر الغيبة =ولـو عن بسمتي قد طـوّل غيابي
أعـرفه زيـن وأعيتني أسـاليبه= عدوي يوم ويوم أقرب من أصحابي
مـلكني بين تـرغيبه وتـرهيبه =يفـارقني وهـو واقف على بـابي
به الصادق به الغـارق بأكاذيبـه =يبي بعـدي ودمعـه بـلل ثـيابي
به القسـوة به الرقـة به الهيبـة =به الضعف القوي به نشوة إغضابي
هلا باللي علي يقسى وأمـاريبه= هلا باللي أبـد مـا لان لعتـابي

مرت سنه مالك على البال طاري =لا جاد لك حظٍ ولا سولفوا فيك
وينك بلم من الجروح الذواري =طال الهبوب وطال مسراه ساريك
لا مانتظرتك بس .. طال انتظاري =لا ما ذكرتك بس ..لا تقول ناسيك
أشتاق لك مثلك .. وتشتاق داري =أحتاج لك دايم ولو قلت مابيك
لا تطري الفرقا ولا تقول ساري =تو الوصل ما بلل عروق مغليك
بهديك خفقة من خفوق المساري =وعطني عيونك لجل أشوف العمر فيك

محريين بالخير يا مزن النشا =يا حلو عقب الوسم رجع السحاب
هل رذراذك على روض الحشا =ربّـعْ بقـــلبٍ دوامٍ لك شبــاب
كل زهر فاح عطره واغتشى =بالريــاض وبالنــفود وبالهضاب
ما نسيتك يا هوى بالي حشا =حـــبك بقلبي وبالخــــفاق ذاب
عادني شوقٍ قـــديمٍ وانتشى =في هواك مــــــولعُّ ما قط غاب
لو غشاني بالموده ما غشى =أشتهي فيك الهوى لو هو عذاب
فيك من مشيَ الظبي ليمن مشى =لين عاود وألتفت ثم ستراب
يا حلو فزة ْ جفـــالك يا رشا =يوم تسبح بالصحاري في سراب
الهوى ماعطيك مني ما تشا =في حياتي يا حياتي لا تـــهاب
ما يفوز الحاسد اللي بك وشا =فيك حســـاد الهوى يأكل تراب