يا صاحبي لا ترخي العزم وتحير
والليل لا هب الهوى لا تنومه

لو كنت قاومت التصحر بتشجير
يوم ان ثوبك طايلاتٍ كمومه

ما كان جا في نجدة الوقت تاخير
ولا كان حاش العج حولك ردومه

لكنّ خل العفش يمشي على السير
دام المسافر ما دروا عن قدومه

والسالفة مهيب تحتاج تبرير
رضى البشر ما كل شخصٍ يرومه

شب الحطب وادن الدلال المباهير
جمر الغضى ماهو كدادة ودومه

ومن بعد تقديمٍ ومن بعد تاخير
المنظر المهزوز قربت زومه

وسويت لي عن مقتضى الحال تقرير
يشمل تفاصيل الخبر في عمومه

وايقنت بن الناس تحتاج تنوير
وكفٍ بها رقة وكفٍ لطومة

والوضع يبغاله تنقل وتدوير
والمشكلة تحتاج قعدة وقومة

من شان ما يرجع زمان الاساطير
اهل الشراهة والحلوق اللهومه

الي يحوشون الذهب بالقناطير
والسيل في الوادي يبنّو عقومه

والبحر يبغى من براسه صعاطير
يقدر الى جات العواصف يعومه

والبر يبغاله سيوفٍ بواتير
حديدها ضدالصدا والثلومة

خالد بن مشرف