ليت لي قلبٍ بليد .. ولي عيونٍ : تنام
كان ما والله لحقني على نفسي عتـب
لابكيت احدٍ طواه الجفا تحـت الظـلام
ولاذكرت من الشجر حاجة ٍغير الحطب
مير لي قلبٍ.. تجمع به : الما والحمام
ممتلي صبحه : نخيل ومواويل و قصب
لو تمرّه ريحة الدمع في لحظـة زحـام
خلته من غير عشبٍ ندي .. ولا رطب
ايه انا من سلّم .. وردت الريح السلام
واطلق بجنحانها بعض الاوراق وكتـب
عاشقٍ حاول يغنّي على هـذا الحطـام
لانبت صوته .. ولا من خذا عنه التعب
باقيٍ للعشق في داخلة : رعشة غـرام
توجعه .. لين يتراخى من الدمع الهدب
مابقى به شي .. ماكان باقي به كـلام
كانت قلوبٍ بليده .. قلوبٍ من خشـب