بري حالي كلما جيت افكر ف الحياة
كيف يطوينا عجلها وحنا غافلين

لا صلاة زينة ولا صيام والا زكاة
تشفع لنا يوم ما تنفع اموال وبنين

لو نشدنا شايب ثالث رجوله عصاه
قال ماقدمت شي لرب العالمين

خل عنك الشايب وكلمته وانشد نماه
والله انه غارقن في ذنوبه من سنين

يابن آدم كان لك في الزمن وجه وجاه
الاخره ما تعرف الجاه والوجه المكين

استعد لساعة الحشر يامال الغناه
ساعة فيها ومنها تشيب المرضعين

لاتقول العمر توه في اول مبتداه
السنين تمر والعاقبة للمتقين

وان لقيت اللي من الناس ماشي في عماه
قل له الدنيا واهلها وحنا راحلين

وقله ان مالك من القبر واهواله نجاه
جعلنا وياك من زمرة اصحاب اليمين

وان لقيت اللي من الناس يسعى للغناه
قله ان الخالق بيبعثه صفر اليدين

وان لقيت اللي من الناس لاهي في عناه
قله ان ماله سوى ماكتب له في الجبين

يا مدور للسعادة تراها في الصلاة
قم توض وتب الى الله وخذ لك ركعتين ..

اعجبتني ونقلتها لكم