منتديات بني عمرو - الصمت بعض احيان ماني بـ ادانيه

الصمت بعض احيان ماني بـ ادانيه
لو تمدحون الصمت دقّه وجلّه

احتاج اسولف للقديم ومواريه
واحتاج لي تمْرة وفنجال دلّة

في لحظةٍ تغلق مجال المشاريه
تفتح لغايات المشاعر مظلّة

اعاند احساس الغياب وطواريه
اللي جعل ساعات وقتي مملة

حتى تغيب الروح في سكْرة التيه
الغيبة اللي تذهب العقل كلّه

واسترجع الماضي وانا عايشٍ فيه
الماضي اللي قاع صدري محلّه

يوم الرضى شيخٍ كبارٍ هقاويه
شيخٍ لما سولف لايمكن تملّه

ياطيب وقفاته وياطيب طاريه ..
مشاعره وقت القسى مسفهلّة

غير الزمن خالف وحارب مباديه
ولاترك له فرصةٍ مستقلّة .!

لين انعزل عمّا يحبّه ويغليه
ويخاف حتى من طواريف ظلّه

والعُمر قد راح اوله جعل تاليه
ماعاد يمضي غير في طاعة الله